Шаирбек Ташиев. nazarnews.org сайти фотосурати
Қирғизистон Миллий хавфсизлик давлат қўмитаси (МХДҚ) собиқ раиси Қамчибек Ташиевнинг укаси, республика парламенти собиқ депутати Шаирбек Ташиев тергов изоляторидан уй қамоғига ўтказилди. Бу қарор коррупцияда гумон қилинаётган шахс давлатга етказилган зарарнинг асосий қисмини қоплаганидан сўнг қабул қилинган. Бу ҳақда мамлакат Ички ишлар вазирлигига таяниб, 24.kg нашри хабар берди.
Ички ишлар вазирлиги Жиноят кодексининг «Коррупция» моддаси бўйича айблов қўйилган собиқ депутат иши бўйича тергов ҳаракатларини давом эттирмоқда.
Тергов маълумотларига кўра, Ташиев «Қирғизнефтегаз» ва «Қирғиз Петролеум Компани» компаниялари мансабдор шахслари билан биргаликда ёқилғи-мойлаш материалларини сотиш бўйича қонунга хилоф схема ташкил этган. Натижада давлатга 4,1 миллиард сомдан ортиқ (47 миллион доллар) миқдорида моддий зарар етказилган.
Шу билан бирга, МХДҚ собиқ раҳбарининг укаси етказилган зарарнинг асосий қисмини қоплаган. Гап айнан қанча сумма ҳақида кетаётгани маълум қилинмаган.
Бироқ ушбу ҳолат инобатга олиниб, Ташиевга нисбатан аввал танланган эҳтиёт чораси ўзгартирилган — суд гумонланувчини қамоқдан озод қилиб, уй қамоғига ўтказган.
Шу билан бирга, Kaktus.Media нашри хабар беришича, кичик Ташиев умуман Бишкекдаги тергов изоляторида бўлмаган, у қўлга олингандан сўнг пойтахт Ички ишлар бош бошқармасининг вақтинча сақлаш ҳибсхонасида сақланган.
Вазирлик бу маълумотни тасдиқлаб, собиқ депутат тергов изоляторига олиб борилмаганини, чунки у билан тергов ҳаракатлари ўтказилганини изоҳлаган.
Жорий йил 1 апрель куни Шаирбек Ташиев қўлга олингани ва Бишкек шаҳар ИИББ вақтинча сақлаш ҳибсхонасига жойлаштирилгани ҳақида хабар берилган эди. Унга нисбатан нефть-газ соҳасидаги коррупция ҳолатлари бўйича жиноят иши қўзғатилган. Бу ҳолатлар аудиторлик текшируви ва Давлат солиқ хизмати материаллари асосида аниқланган.
Кейинроқ маълум бўлишича, собиқ депутатнинг ноқонуний операциялари оқибатида етказилган зарар 4,1 миллиард сомдан ортиқни (47 миллион доллар) ташкил этган. Бу суммага бой берилган фойда ҳамда тўланмаган солиқлар киради. Масалан, «Қирғизнефтегаз»нинг 2023 йил учун солиқ қарзи тахминан 60,5 миллион сомни (692 минг доллар), «Қирғиз Петролеум Компани»нинг солиқ қарзи эса қарийб 54,4 миллион сомни (622 минг доллар) ташкил этган.
