КазТрансОйл фотосурати
Қозоғистондаги Тенгиз кони оператори — «Тенгизшевройл» уч ойлик танаффусдан сўнг нефть экспортини Грузиянинг Батуми порти орқали қайта тиклади. Компания Каспий қувур консорциуми (КҚК) терминали орқали юклаш ишлари яна тўхтатилгани фонида муқобил йўналишдан фойдаланишни фаоллаштирди. Бу ҳақда Reuters агентлиги вазиятдан хабардор икки манбага таяниб хабар берди.
Манбалардан бирининг сўзларига кўра, Тенгиз конидан тахминан 20 минг тонна нефть Батуми йўналишига жўнатилган. Хомашё темир йўл цистерналари орқали Грузия портига етказилмоқда, у ерда эса кейинчалик Қора денгиз орқали Туркияга ташиш учун танкерларга юкланади.
«Тенгизшевройл» ушбу маълумотга изоҳ бермаган.
КҚК Қозоғистон нефти экспортининг 80 фоиздан ортиғини таъминлайди, жумладан, мамлакатнинг энг йирик конлари — Тенгиз, Қашаған ва Қорачиғаноқдан олинадиган хомашёни ҳам ташийди. Бироқ, 30 июль куни консорциум Новороссийск ҳудудидаги денгиз терминалида нефть юклаш ишларини яна тўхтатди. Бунга танкерларга навбатдаги дронлар ҳужуми сабаб бўлган.
КҚК фаолияти учун сақланиб қолаётган хавфлар фонида «Тенгизшевройл» экспорт йўналишларини диверсификация қилмоқда. Батуми йўналишидан ташқари, компания Германияга нефть етказиб бериш учун «Дружба» нефть қувуридан (2026 йил май ойигача), шунингдек, Боку — Тбилиси — Жайҳун (БТЖ) йўналишидан фойдаланмоқда.
Аввалроқ, 2026 йил март ойида компания КҚК ишидаги чекловлар сабаб Батуми орқали экспортни уч йиллик танаффусдан сўнг қайта тиклаган эди. Ўшанда ноқулай об-ҳаво шароити ва дронлар ҳужуми хавфи туфайли КҚК фаолияти чеклангани ортидан компания қарийб 97 минг тонна нефть жўнатган.
Каспий қувур консорциуми фаолиятидаги узилишлар аввал ҳам Қозоғистонда нефть қазиб чиқариш ҳажмларининг қисқаришига олиб келган, чунки мамлакат экспортининг асосий қисми айнан шу тизим орқали амалга оширилади. «Тенгизшевройл» компаниясининг асосий акциядори Американинг Chevron компанияси бўлиб, унга 50 фоиз улуш тегишли. Яна 25 фоиз улуш Американинг ExxonMobil компаниясига, 20 фоизи «ҚазМунайГаз»га, 5 фоизи эса Lukoil компаниясига қарашли.
Батуми нефть терминали «ҚазТрансОйл» компаниясига тегишли. Унинг қуввати йилига 12 миллион тоннагача нефть ва нефть маҳсулотларини қабул қилиш имконини беради.
