Улуғ Ватан уруши йилларида Витебскни озод қилишда ҳалок бўлган ўзбекистонликлар хотирасига ўрнатилган ёдгорликнинг очилиш маросимида. vitbichi.by сайти фотосурати
Беларуснинг Витебск туманидаги Шапури қишлоғида Улуғ Ватан уруши йилларида Витебскни озод қилишда ҳалок бўлган ўзбекистонликлар хотирасига бағишланган ёдгорлик очилди. Бу ҳақда БелТА хабар берди.
Маросим 15 октябрь куни қарийб 18 минг совет жангчиси, жумладан, Ўзбекистонда туғилган 729 нафар ҳарбий дафн этилган биродарлик қабристонида бўлиб ўтди. Тадбирда Витебск вилояти ижроия қўмитаси раиси Александр Рогожник, Ўзбекистоннинг Беларусдаги элчиси Нуриддин Мамажонов ва Андижон вилояти ҳокими Шуҳратбек Абдураҳмонов иштирок этди.
Уруш йилларида Шапури қишлоғи шиддатли жанглар майдонига айланган. Айнан шу ерда «Багратион» операцияси давомида немис мудофаасини ёриб ўтиш бошланган. Витебск тумани ижроия қўмитаси раиси Сергей Егоровнинг таъкидлашича, бу Беларусдаги энг йирик ҳарбий дафнгоҳлардан биридир. Унинг сўзларига кўра, Витебск заминида Ўзбекистонда туғилган 1,3 мингдан ортиқ киши мангу қўним топган.
«Бугун биз улар шарафига ўрнатилган ёдгорликни очмоқдамиз ва уларнинг жасорати ҳамда буюк матонати олдида бош эгамиз. Ўзбекистонлик қаҳрамонларнинг жасорати беларусликлар қалбида абадий сақланиб қолади», — деди Егоров.
Андижон вилояти ҳокимининг ташқи иқтисодий фаолият бўйича маслаҳатчиси Остонақул Мирзаев уруш бошланган пайтда Ўзбекистон аҳолиси 6,5 миллион кишини ташкил этганини, улардан 2 миллион нафари фронтга сафарбар қилинганини — яъни ҳар учинчи одам урушга кетганини эслатди. Уларнинг 500 мингдан ортиғи ҳалок бўлган. Мирзаев ёдгорлик белгисини икки халқнинг муштарак хотираси рамзи деб атади ва уни ўрнатишда иштирок этган барчага миннатдорлик билдирди.
Шуҳратбек Абдураҳмоновга Витебск заминидан олинган тупроқ солинган капсула топширилди. Маросим иштирокчилари ҳарбий мемориал ва янги ёдгорлик белгиси пойига гуллар қўйишди.
-
Улуғ Ватан уруши йилларида Витебскни озод қилишда ҳалок бўлган ўзбекистонликлар хотирасига ўрнатилган ёдгорликнинг очилиш маросимида. vitbichi.by сайти фотосурати
-
Улуғ Ватан уруши йилларида Витебскни озод қилишда ҳалок бўлган ўзбекистонликлар хотирасига ўрнатилган ёдгорликнинг очилиш маросимида. vitbichi.by сайти фотосурати
-
Улуғ Ватан уруши йилларида Витебскни озод қилишда ҳалок бўлган ўзбекистонликлар хотирасига ўрнатилган ёдгорликнинг очилиш маросимида. vitbichi.by сайти фотосурати
Андижон вилояти делегациясининг ташрифи минтақалараро ҳамкорликни ривожлантириш билан боғлиқ. 2026 йил август ойида Витебск ва Андижон вилоятлари ҳамкорлик тўғрисидаги битимни ҳамда 2028 йилгача мўлжалланган қўшма лойиҳалар йўл харитасини имзолаган эди. Ҳозирда Витебск вилоятида ўзбекистонлик тадбиркорлар томонидан ташкил этилган 10 дан ортиқ фермер хўжалиги фаолият юритмоқда. 16 октябрь куни Городок туманидаги «Наврўз» агрокластеридаги асосий лойиҳа — чорвачилик мажмуаси қурилишини бошлаш муносабати билан капсула қўйиш маросими бўлиб ўтади.
