Капсула қўйиш маросими. Фото: 24.kg
Қирғизистоннинг Чуй вилояти Сўқулуқ туманидаги Камишановка қишлоғида Қозоғистон билан чегарадаги «Тўмўнку-Чуй» янги халқаро автомобиль ўтказиш пункти мажмуаси қурилишининг бошланиш маросими бўлиб ўтди. Уни чегарани кесиб ўтишни тезлаштириш ва навбатларни қисқартириш имконини берувчи замонавий назорат тизимлари билан жиҳозлаш режалаштирилган. Бу ҳақда Қирғизистон Давлат чегара хизматига таянган ҳолда «Кабар» хабар беради.
Янги мажмуа 33,06 гектар майдонда жойлашади ва ҳар икки йўналишда йўловчиларга, енгил ҳамда юк транспортига хизмат кўрсатган ҳолда туну кун ишлайди. Лойиҳада саккизта ҳаракатланиш йўлаги, 12 та паспорт назорати кабинаси ва ҳужжатларни тезкор текшириш учун автоматлаштирилган электрон дарвозалар барпо этилиши кўзда тутилган. Бундан ташқари, бу ерда маъмурий ва хизмат бинолари, автотранспортни кўздан кечириш хоналари, автоулов тўплаш майдончалари ҳамда зарур муҳандислик инфратузилмаси қурилади.
Капсула қўйиш маросимида Қирғизистон Давлат чегара хизмати раиси Данияр Сатимов ушбу қурилишни мамлакатнинг йирик инфратузилма лойиҳаларидан бири деб атади. Унинг сўзларига кўра, янги мажмуа фуқаролар учун янада қулай шароитлар яратиши, юк ташувини енгиллаштириши ва чегарани кесиб ўтиш хавфсизлигини ошириши керак. Ҳукумат, шунингдек, ўтказиш пунктининг модернизация қилиниши кутиш вақтини қисқартириши ва Қирғизистон ҳамда Қозоғистон ўртасидаги савдо ривожига ҳисса қўшишидан умидвор.
Қурилиш Қирғизистон республика бюджетидан молиялаштирилмоқда. Лойиҳани амалга ошириш учун 24 ой ажратилган бўлиб, ишларни якунлаш 2028 йилнинг ноябрига режалаштирилган. Қурилиш қиймати очиқланмаган.
ℹ️ 2025 йил августида Қирғизистон ва Қозоғистон умумий чегарадаги бир қатор ўтказиш пунктларининг мақомини ўзгартириш тўғрисида баённома имзолаган эди. Келишувларга мувофиқ, «Камишановка — автомобиль йўли» чегара ўтказиш пункти номи «Тўмўнку-Чуй» деб ўзгартирилди ҳамда унга туну кун ишлаш тартиби кўзда тутилган халқаро мақом берилди. Худди шундай халқаро мақом «Кичи-Капка» пунктига ҳам берилди. 2026 йилнинг июлидаёқ Қирғизистон ҳукумати бевосита «Тўмўнку-Чуй» қурилиш майдончасида йиғилишлар ўтказган эди, шу боис ҳозирги маросим лойиҳани нолдан бошлашни эмас, айнан янги мажмуа қурилишини англатади.
