«Манас» аэропорти. 24.kg сайти фотоси
Бишкек яқинидаги «Манас» халқаро аэропортида Хитойдан Европа ва Яқин Шарқ мамлакатларига товарларни ташиш учун майдони 40 минг квадрат метр бўлган юк терминали қуриш режалаштирилмоқда. Бу ҳақда «Қирғизистон аэропортлари» ОАЖ бошқаруви раиси Манасбек Самидиновга таяниб, «Кабар» агентлиги хабар бермоқда.
Терминал қурилишини компаниянинг ўз маблағлари ҳисобидан молиялаштириш кўзда тутилган. Мажмуа таркибига халқаро логистика операторлари талабларига жавоб берадиган А ва В тоифасидаги божхона омборлари киради.
Самидиновнинг сўзларига кўра, лойиҳада хавфли юклар, тиббий препаратлар, тез бузиладиган маҳсулотлар ва ўсимликларни сақлаш учун махсус хоналар яратиш назарда тутилган. Бундан ташқари, алоҳида тоифадаги товарлар учун лабораториялар ва стерил хоналарни жиҳозлаш режалаштирилган.
Хитойдан маҳсулотлар Қирғизистонга автомобиль транспортида етказилиши кутилмоқда. Юклар аэропорт омборларига жойлаштирилгач, Европа ва Яқин Шарққа кейинчалик жўнатиш, жумладан, ҳаво транспорти орқали ташиш учун партияларга бирлаштирилади. Бундай схема логистика харажатларини қисқартириш имконини бериши кутилмоқда.
Самидинов мазкур лойиҳа Хитой ҳамкорлари ва йирик халқаро логистика компанияларида аллақачон қизиқиш уйғотганини маълум қилди. «Қирғизистон аэропортлари» вакиллари ушбу мамлакатнинг йирик ҳаво бандаргоҳларидаги юк терминаллари иши билан танишиш учун Хитойга ташриф буюришни режалаштирмоқда.
Қирғизистон лойиҳасининг қиймати, қурилиш муддатлари ва кутилаётган юк ташиш ҳажмлари ҳозирча маълум қилинмаган.
«Манас» аэропортида халқаро логистика хабини яратиш ғояси бир неча йилдан буён муҳокама қилинмоқда. Ҳали 2023 йил июнида аэропорт раҳбарияти электрон тижорат корхоналарига хизмат кўрсатиш учун «Қирғиз почтаси» билан ҳамкорликда божхона омборларини очиш режаларини эълон қилган эди. 2025 йил июлида «Қирғизистон аэропортлари», «Қирғиз почтаси» ва «Божхона инфратузилмаси» божхона терминаллари, омборлар ва рақамли хизматларга эга мультимодал логистика марказини ташкил этиш бўйича меморандум имзолади. Қирғизистон делегацияси Хитойнинг ZTO Cloud Warehouse компанияси тажрибасини ҳам ўрганди. Шу билан бирга, эълон қилинган 40 минг квадрат метрлик терминал илгари келишилган лойиҳанинг бир қисмими ёки йўқми, ҳозирча аниқлик киритилмаган.
Эълон қилинган маълумотларга кўра, 2024 йилда Қирғизистон аэропортлари 32,8 минг тонна юкни қайта ишлаган бўлиб, шундан 31,4 минг тоннаси «Манас» ҳиссасига тўғри келган. Шу тариқа, мамлакатнинг асосий халқаро аэропорти ҳисобига юк авиаташувларининг қарийб 96 фоизи тўғри келган.
