azathabar.com сайти фотосурати
Туркманистон президенти Сердар Бердимуҳамедов ҳукумат йиғилишида миллий валюта курсини ошириш чораларини кўришни буюрди. Бу ҳақда «Туркменистан сегодня» нашри ёзади.
«Президент Сердар Бердимуҳамедов иқтисодиётда молиявий ресурсларнинг барқарор айланмасига эришиш, миллий инвестиция лойиҳаларини молиялаштириш манбаларини мунтазам ўрганиш, шунингдек бошқа банкларнинг иқтисодиёт тармоқларидаги ишлаб чиқаришни кредитлаш борасидаги фаолиятини фаоллаштириш зарурлигини таъкидлади. Туркманистон раҳбари кредитларнинг мақсадли сарфланишини таъминлаш, уларнинг самарадорлигини ошириш, миллий валюта курсини ошириш бўйича тегишли чора-тадбирларни кўриш ва халқаро молия ташкилотлари билан ҳамкорликни кенгайтириш зарурлигини таъкидлаб, бу борада тегишли топшириқлар берди», — дейилади 14 июль куни бўлиб ўтган Туркманистон Вазирлар Маҳкамаси йиғилиши ҳақидаги хабарда.
Эслатиб ўтамиз, Туркманистон миллий валютасининг расмий курси – бир доллар учун 3,5 манат – 2015 йилдан буён ўзгаришсиз қолмоқда. Ҳақиқий валюта курси (қора бозорда) расмий курсдан бир неча баравар юқори туради. Масалан, 2018 йил июнь ойида бир доллар қарийб 30 манат бўлган бўлса, 2021 йилнинг апрелида унинг қиймати 41 манатга кўтарилган. Жорий йилнинг июль ойида реал курс бир доллар учун 19-19,5 манатни ташкил этиб, расмий курсдан беш баравар кўпроқ ошиб кетган.
Агар долларнинг расмий курсига эътибор қаратилса, Туркманистон фуқароларининг турмуш даражаси қўшнилариникидан анча юқори деган хулосага келиш мумкин, ҳаттоки бу мамлакатда энг кам иш ҳақи 61 доллар эмас, балки 331 доллар эквивалентида бўлади (1160 манатни 19 га эмас, 3,5 га бўлганда). Худди шу мантиққа кўра, Туркманистон фуқаролари, масалан Пекинга чипта учун 2651 доллар, Лондонга эса 2550 доллар тўлаш қудратига эга. Ҳақиқий курс бўйича Пекинга чипта нархи – 9280 манат – тахминан 480 доллар, Лондонга – 8926 манат – 460 долларни ташкил қилади.
Шу куни, 14 июл куни Сердар Бердимуҳамедов 2024 йил 1 январдан бошлаб талабалар ва тингловчиларнинг иш ҳақи, пенсиялар, давлат нафақалари, стипендияларни 10 фоизга ошириш тўғрисидаги фармонни имзолади.
Фармонга мувофиқ:
👉 Энг кам иш ҳақи 1280 манат (расмий курс бўйича 365,7 доллар ёки реал курс бўйича 65,6 доллар)га кўтарилган;
👉 Улуғ Ватан уруши қатнашчилари учун энг кам пенсия миқдори ойига 2070 манатни ташкил этади (расмий 591 доллар ёки реал 106 доллар);
👉 Улуғ Ватан уруши қатнашчилари ва фронт орти меҳнат фахрийларининг турмуш ўртоқлари учун энг кам пенсия миқдори ойига 605 манат (расмий 173 доллар ёки реал 31 доллар);
👉 пенсияларнинг энг кам миқдорини белгилашнинг базавий қиймати 500 манат (расмий маълумотларга кўра 143 доллар ёки реал бўйича 25,6 доллар);
👉 Давлат нафақаларини ҳисоблашнинг базавий қиймати 470 манат (расмий $134 ёки реал $24) дан иборат.
