Туркманистоннинг Тошҳовуз вилоятининг Ғорўғли этрапида (туман) имтиёзли нархдаги ун учун навбатда турганлар ўртасида муштлашув оқибатида бир аёл ҳалок бўлган. Воқеа юзасидан дўкон сотувчиси ҳибсга олинган. Бу ҳақда «Азатлиқ» (РФда хорижий агент сифатида тан олинган Озодлик радиосининг туркман хизмати) ўз манбасига таяниб хабар берди.
Қайд этилишича, воқеа 14 июль куни этрап марказидан уч километр шарқда жойлашган Яғтилиқ (собиқ Ленинград қишлоғи) дайхон бирлашмасидаги 19-сонли давлат дўкони олдида содир бўлган. Ун учун навбатда турганлар ўртасидаги жанжал чоғида 45 ёшли аёл дўкон олдидаги зинадан йиқилиб, воқеа жойида вафот этган.
«Ўтган жума куни Ғорўғлида кундузи ҳаво ҳарорати сояда 44 даражадан ошди. Дўкон олдига уч ойдан бери имтиёзли нархда ун тарқатилишини кутган 300 га яқин одам тўпланган. Дўкон олдида соя ҳам бўлмаган, одамлар жазирама қуёш остида тўрт соатлаб ун тарқатилишини кутиб туришган», — дейди «Азатлиқ» манбаси.
Сотувчи олиб келинган ун жуда оз бўлиб, ҳаммага етмаслигини эълон қилганда, одамлар дўкон эшигига ёпирилиб келишган. Навбат олдиндан белгилаб қўйилганига қарамай, одамлар ун сотиб олишга ҳаракат қилиб, ур-сур бошланган. Оқибатда қишлоқ аҳолиси ўртасида сўкиниш бошланган ва у муштлашувга айланган.
«Оқибатда олти фарзанднинг онаси рацион ун учун жанжал қурбони бўлган. Жанжал пайтида ур-йиқит бошланган, аёл зинапоядан йиқилиб, боши билан зинапоя четига қаттиқ урилган. У оғир тан жароҳати олиб воқеа жойида вафот этган», — дея хабар беради «Азатлиқ».
Қишлоқ аҳли жабрланувчини этрап касалхонасига олиб боришган, шифокорлар у ерда аёлнинг ўлганини қайд этишган.
Воқеа юзасидан Этрап Жиноят қидирув бошқармаси томонидан тергов ҳаракатлари олиб борилиб, давлат дўконининг сотувчиси қўлга олинган.
«Одамлар дўконга итарилиб кира бошлашганида, сотувчи уларни итариб юборган ва аёл қаршилик кўрсата олмай, зинадан йиқилиб вафот этган, деган тахминлар бор. Энди улар кузатув камераларидаги ёзувларни ҳам текширишмоқда. Воқеа муносабати билан навбатда турган одамлар сўроқ учун этрап полициясига чақирилмоқда», — дейди манба.
Воқеа аҳолига арзонлаштирилган нархларда сотиладиган озиқ-овқат рационининг тақчиллиги билан боғлиқ вазиятнинг ёмонлашаётгани фонида содир бўлган. Иқтисодий инқирознинг кучайиши ва ишсизликнинг кучайиши билан аксари туркман оилалари имтиёзли нархдаги озиқ-овқатларга қарам бўлиб қолишган.
Давлат дўконлари орқали аҳолига тарқатиладиган озиқ-овқат рациони рўйхатида ун, нон, ўсимлик ёғи сақланиб қолган.
Сўнгги пайтларда Туркманистоннинг турли вилоятларидан ҳар ойда бир марта киши бошига 5 килограммдан сотилиши керак бўлган ун бир неча ой кечикиб келаётгани ҳақида хабарлар пайдо бўлган. Айрим ҳолларда аҳолига белгиланган 5 кг ўрнига атиги 1 кг ун берилмоқда.
