Учтомонлама келишув имзоланиши маросими. Ўзбекистон Энергетика вазирлиги матбуот хизмати фотосурати
Қозоғистон, Қирғизистон ва Ўзбекистон Энергетика вазирликлари Норин дарёсида Қамбарота ГЭС-1 қурилиши лойиҳасини амалга оширишга тайёргарлик кўриш тўғрисидаги битимни имзолади. Тегишли маросим 10 июнь куни Вена шаҳрида Қирғизистон ҳукумати томонидан Жаҳон банки ва Австрия расмийлари кўмагида ташкил этилган Халқаро энергетика инвестиция форуми доирасида бўлиб ўтди.
Ўзбекистон Энергетика вазирлиги матбуот хизмати хабарига кўра, уч томонлама битимнинг имзоланиши қўшниларнинг ушбу соҳада, жумладан қайта тикланадиган энергия манбалари соҳасида ҳамкорликни янада кенгайтириш ниятини тасдиқлайди. Бундан ташқари, ҳужжатда Қирғизистонда қурилаётган ГЭСнинг сув-энергетика ресурсларидан фойдаланишнинг ўзаро мақбул механизмлари кўрсатилган.
Форум очилишида Қирғизистон ҳукумати раиси Ақилбек Жапаров сўзга чиқиб, ушбу лойиҳанинг муҳимлигини таъкидлади. Сиёсатчи Қамбарота ГЭС-1 музликлар поёнида жойлашгани ва унинг самарали ишлаши Тўқтўғул сув омбори ресурсларини тўплаш ва ундан оқилона фойдаланиш имконини беришини эслатди.
«Лойиҳа Қирғизистон Республикаси ва Марказий Осиёни энг кам харажатлар орқали тоза энергия билан таъминлайди, бу эса минтақадаги энергияга ўтиш харажатларини камайтиради. ГЭСларда электр энергияси ишлаб чиқарилиши атмосферага ифлослантирувчи моддаларнинг чиқарилишини камайтиради», — деди Жапаров.
Вазирлар Маҳкамаси раҳбари Норин дарёсининг юқори оқимида жойлашган станциянинг техник хусусиятларига тўхталиб ўтди. Шундай қилиб, унинг қуввати 1860 мегаваттни, ўртача йиллик электр энергияси ишлаб чиқариш эса 5,6 миллиард киловатт/соатни ташкил қилади.
Қирғизистон расмийларига кўра, иншоот қурилишининг дастлабки ҳисоб-китоблари 4 миллиард доллардан ошади.
Шу билан бирга, ГЭС қурилишига тайёргарлик ишлари икки босқичга бўлинган ҳолда умумий қиймати 44,1 миллиард сўм (тахминан 507 миллион доллар) бўлади. Бош вазир 2023-2030 йилларга мўлжалланган станция қурилиши учун республика бюджетидан қўшимча 500 миллион доллар ажратилишини қўшимча қилди.
11 июнь куни Қирғизистон ҳукумати матбуот хизмати Венадаги форум Қамбарота ГЭС-1 қурилиши бўйича Мувофиқлаштирувчи донор қўмитасини тузиш билан якунланганини маълум қилди. Бу органга, жумладан, Жаҳон банки, ОПEК жамғармаси, Осиё тараққиёт банки, Ислом тараққиёт банки ва Европа тикланиш ва тараққиёт банки киради. Қўмитанинг биринчи йиғилиши жорий йилнинг кузида бўлиб ўтади.
Ақилбек Жапаровнинг айтишича, янги тузилма миллий лойиҳа – Қамбарота ГЭС-1 қурилишини амалга ошириш учун ҳаракатларнинг давоми ва «соатларни солиштириш» бўлади. Сиёсатчи Австрия сармоявий форумининг барча иштирокчиларига миннатдорчилик билдирди.
Тадбир давомида гидроэлектр станциясини қуришга тайёргарлик кўриш бўйича келишувдан ташқари, бу борадаги ҳамкорлик бўйича яна бир қанча шартномалар имзоланди. Жумладан, қуёш энергетикасини ривожлантириш, нимстанцияларни реконструкция қилиш, электр тармоқларини қуриш бўйича.
