kursiv.media сайти фотосурати
Ўзбекистонда ўтган йил якунларига кўра, камбағаллик даражаси 11 фоиздан 8,9 фоизга камайган. Шу тариқа, 719 минг киши кам таъминланган фуқаролар тоифасидан чиқарилди. Тадқиқот маълумотлари Республика Бандлик ва камбағалликни қисқартириш вазирлиги сайтида келтирилган.
Қайд этилишича, вазиятни баҳолаш Иқтисодий тадқиқотлар ва ислоҳотлар маркази, Ўзбекистон Президенти ҳузуридаги Статистика агентлиги ва Жаҳон банки мутахассислари томонидан амалга оширилган. Ҳисоб-китоблар халқаро методологиядан фойдаланган ҳолда амалга оширилган, бу ҳисобот йилида бутун мамлакат бўйлаб уй-рўзғор бюджетини ўрганишни назарда тутади.
Таҳлилчиларнинг аниқлашича, ҳудудлар кесимида энг паст камбағаллик даражаси Навоий вилоятида қайд этилган – 5,7 фоиз. Кейинги ўринларда Тошкент (7,3 фоиз), Самарқанд (7,5 фоиз) ва Наманган (7,6 фоиз) вилоятлари жойлашган.
Аутсайдерлар қаторидан Хоразм (11,9 фоиз), Жиззах (11,8 фоиз), Сирдарё (11,3 фоиз) вилоятлари, шунингдек, Қорақалпоғистон (10,8 фоиз) жой олган.
Мамлакатнинг барча ҳудудларида ижобий ўзгаришлар рўй берган, бироқ камбағаллик даражаси 3 фоиз пунктдан кўпроқ пасайган Бухоро ва Самарқанд вилоятларида сезиларли ютуқларга эришилган. Энг паст кўрсаткич — 1% дан кам – пойтахтда қайд этилган.
Мутахассислар ижобий динамикани аҳоли бандлигини таъминлаш, тадбиркорликни қўллаб-қувватлаш ва ердан самарали фойдаланиш билан боғлашмоқда. Натижада, ҳисобот даврида фуқароларнинг реал даромадлари 10,7 фоизга ошиб, ҳар ойда аҳоли жон бошига ўртача 2,1 миллион сўмни (162 доллар) ташкил этган. 2024 йил бошида бу кўрсаткич 1,7 миллиондан (131 доллар) ошмаган.
Асосий даромад манбалари қуйидагича:
✅ иш ҳақи — 42,6%;
✅ тадбиркорлик фаолияти — 22,9%;
✅ пенсиялар, ижтимоий ёрдам ва субсидиялар — 18,2%;
✅ қишлоқ хўжалиги ва томорқа ерлари – 10,7%;
✅ чет элдан пул ўтказмалари — 2%.
Яна 3,6% «бошқа даромадлар» деб таснифланади.
Эслатиб ўтамиз, 3 февраль куни Ўзбекистон Президенти Шавкат Мирзиёев камбағалликни қисқартириш масалаларига бағишланган йиғилиш ўтказди. Давлат раҳбарининг фикрича, 2025 йил бу муаммони ҳал этишда бурилиш даври бўлиши керак. Бу борада 5,2 миллион кишини иш билан таъминлаш, 1,5 миллион фуқарони қашшоқликдан чиқариш режалаштирилган.
Тегишли вазирликлар вакиллари январь ойида мамлакатда 277 минг нафар фуқаро иш билан таъминлангани, шундан 91 минг нафари доимий иш билан таъминлангани, 153 минг нафари тадбиркорлик фаолияти билан шуғулланганини маълум қилди.
Инвестициялар ва меҳнат бозори ўртасида алоқалар яқин экани қайд этилди. Расмийларнинг айтишича, жорий йили 14 миллиард долларлик саккиз мингга яқин лойиҳани амалга ошириш режалаштирилган, бунинг натижасида 272 минг иш ўрни яратилади.
