Қирғизистон МХДҚ матбуот хизмати фотосурати
Фуқаролик фаоли Тилекмат Куренов БААда ҳибсга олинган ва Бишкекка олиб келинган, бу ерда 21 апрель куни суд унга нисбатан 19 майга қадар ҳибсга олиш тарзидаги эҳтиёт чорасини танлаган. Бу ҳақда Қирғизистон пойтахти Первомайский туман суди матбуот хизматига таяниб, 24.kg нашри хабар берди.
Куренов Қирғизистон Жиноят кодексининг 327-моддаси («Ҳокимиятни зўравонлик йўли билан эгаллаб олишга оммавий чақириқ»)да назарда тутилган жиноятни содир этганликда гумон қилинмоқда.
Республика Миллий хавфсизлик давлат қўмитаси маълумотларига кўра, «фаол республикадан ташқарида бўлган вақтида ижтимоий тармоқлардаги аккаунтлари орқали оммавий тартибсизликлар уюштиришга чақирувчи, кейинчалик ҳокимиятни зўравонлик билан эгаллаб олишга уриниш бўйича мунтазам равишда провокацион постлар ва видеомурожаатларни эълон қилган». Куренов 19 апрель куни қўлга олинган.
ℹ️ Аввалроқ, Куреновнинг мактуби ижтимоий тармоқларда эълон қилинганидан сўнг ҳуқуқ ҳимоячиси Рита Карасартова ҳибсга олинган эди. Мактуб фаол томонидан илгари ёзилган ва унинг оиласига бағишланган. Куренов ҳуқуқ ҳимоячисидан унга бирор нарса бўлган тақдирда мактубни нашр этишни сўраган. Фаолнинг яқинларига кўра, у 10 апрель куни Дубайда ғойиб бўлган, шундан сўнг Карасартова Facebook (РФда экстремистик деб тан олинган ва тақиқланган Meta корпорациясига тегишли тармоқ) даги саҳифасида мактубни эълон қилган. 14 апрель куни хавфсизлик кучлари Қорасартованинг уйида тинтув ўтказган, шундан сўнг у қўлга олиниб, вақтинчалик сақлаш ҳибсхонасига жойлаштирилган. Кейин Бишкекнинг Свердловск туман суди қарори билан аёл 12 майга қадар тергов ҳибсхонасига жўнатилган.
