eenergy.media сайти фотосурати
Mubadala инвестиция копрорацияси ва БАА вакили TAQA энергетика компанияси Ўзбекистондаги Толимаржон энергетика мажмуасидаги газ электр станциясини сотиб олиш бўйича келишувни якунлади. Бу ҳақда TAQA сайтида чоп этилган пресс-релизда айтилган.
Қайд этилишича, объектнинг қонуний эгаси Talimarjan Power Plant 1 лойиҳа компанияси бўлиб, унинг 40 фоиз акциялари Амирликларнинг ҳар бир инвесторига тегишли. Қолган 20 фоизи «Толимаржон иссиқлик электр станцияси» давлат корхонаси томонидан назорат қилинади.
Иссиқлик электр станциясини эксплуатация қилиш ва техник хизмат кўрсатиш учун алоҳида янги юридик шахс ташкил этилган. Бу корхонада бошқарувда бир хил улушларга эга бўлган ўша акциядорлар мавжуд.
БАА энергетиклари ушбу лойиҳада ИЭС мажмуаси таркибига кирувчи 875 МВт қувватга эга газ-турбинали станцияни ривожлантириш учун инвестициялар жалб этиш назарда тутилишини таъкидлайдилар. Шу билан бирга, объектнинг янги эгалари Ўзбекистон билан 25 йиллик электр энергиясини сотиб олиш бўйича шартнома имзолашганини таъкидлашган. Яъни, бу даврда Марказий Осиё республикаси Толимаржон станциясида ишлаб чиқариладиган ресурсларни сотиб олади. Шартнома тафсилотлари номаълум.
Битимни шарҳлар экан, TAQA нинг инвестициялар бўйича директори Франк Поссмейер ўз компанияси тажрибаси ва билимини Ўзбекистон энергетика сектори манфаати учун ишлатиб, ушбу муҳим соҳага сармоя киритишда давом этишини айтган.
Ўзбекистонлик молиячи Отабек Бакиров ҳам ушбу лойиҳа ҳақида гапирган. Мутахассиснинг фикрича, бу ерда жиддий саволлар туғилади ва расмийлар ҳали жавоб бермаган. Хусусан, 1700 МВт қувватга эга ИЭСни инвесторлар тўлиқ сотиб олдими ёки фақат бир қисмини сотиб олдими? Маълумки, объектнинг 700 миллион доллар тўланмаган кредитлари бор — янги эгалар бу юкни ўз зиммаларига оладиларми? Республикага электр энергиясини қандай ҳажмда ва қандай нархда сотиб олиш кафолатланади?
Mubadala ва TAQAнинг Толимаржон ИЭС устидан назоратни қўлга киритиш ниятлари 2022 йили эълон қилинганди. Ўшанда БАА инвесторлари томонидан 1 миллиард доллар миқдоридаги сармоя киритишни назарда тутувчи дастлабки келишувлар имзоланган эди. Бундан ташқари, маблағлар 80 фоиз – 300 миллион доллар миқдорида хорижий шериклар улуши бўлган қўшма корхонанинг устав капиталини шакллантиришга йўналтирилиши белгиланганди. Яна 700 миллион доллари «Толимаржон ИЭС» АЖ томонидан илгари жалб қилинган кредитларни тўлашга йўналтирилади.
ℹ️ Mubadala — Абу Даби ҳукуматига қарашли инвестиция компанияси. У дунёнинг 30 дан ортиқ мамлакатларида ишлайди. Компаниянинг инвестицион портфелига аэрокосмик, агробизнес, АКТ, металлга ишлов бериш, тоғ-кон саноати ва коммунал хўжалик каби соҳалардаги лойиҳалар киради. Компаниянинг умумий активлари 250 миллиард доллардан ошади.
ℹ️ TAQA — ADQ, инвестиция холдинг компаниясига тегишли бўлган энергия компанияси бўлиб, дунёнинг 11 дан ортиқ мамлакатларида фаолият юритади.
ℹ️ Толимаржон ИЭС Қашқадарё вилоятининг Нишон туманидаги Нуристон қишлоғида жойлашган. Унинг қурилиши 1984 йили бошланган, аммо СССР парчаланганидан кейин лойиҳа музлатиб қўйилган. 1998 йили қурилиш ишлари қайта тикланган ва 2004 йилнинг декабрида станциянинг биринчи энергоблоки ишга туширилган. 2016 йил октябрь ойида станцияда қуввати 450 мегаватт бўлган биринчи комбинацион электр станцияси, 2017 йилнинг февраль ойида худди шундай қувватдан яна биттаси, август ойида эса яна иккитаси ишлай бошлаган. ИЭСнинг умумий қуввати 1700 МВтни ташкил этади.
