inform-24.com сайти фотосурати
Россияда ҳар учинчи меҳнат мигранти биринчи уринишдаёқ рус тили имтиҳонидан ўта олмаган. Уларнинг ярми кейинги уринишларда ҳам муваффақиятсизликка учраган. Бу ҳақда Россия Таълим ва фан вазирлигига таяниб, ТАСС хабар берди.
«Россия Таълим ва фан вазирлиги имтиҳон натижаларини тизимли мониторинг қилишда давом этмоқда. Аниқланишича, ўрта ҳисобда чет эл фуқароларининг 30 фоизи биринчи уринишда имтиҳондан ўта олмаган. Уларнинг ярмига қадари кейинги уринишларда ҳам имтиҳондан ўта олмаган», — дейди расмийлар.
Вазирликнинг аниқлик киритишича, имтиҳондан ўта олмаган хорижлик фуқароларнинг улуши 2024 йил май ойида тижорат ташкилотларининг имтиҳондан четлатилиши натижасида белгиланган даражада қолмоқда. Ушбу чора-тадбирлар қабул қилинишидан олдин ўз билимларини тасдиқлай олмаган мигрантлар улуши ўртача 3 фоизни ташкил этган. 2024 йил май ойидан бошлаб бу кўрсаткич 30 фоизга ошган.
Эслатиб ўтамиз, мигрантларни комплекс имтиҳондан ўтказиш бўйича ҳуқуқ ва мажбуриятларни учинчи шахсларга беришни тақиқловчи қонун ўтган йил 10 декабридан кучга кирган. Илгари имтиҳонларни шартнома асосида фаолият юритувчи хусусий компаниялар ўтказиши мумкин эди. Янги тартиб Россия Таълим ва фан вазирлиги томонидан Ички ишлар вазирлиги ва Рособрнадзор билан келишилган ҳолда бошланган.
Ўшанда Россия ҳукумати турли ҳолларда чет элликлар учун имтиҳонлар учун ягона нархни тасдиқлаганди. Фуқароликни олишда рус тили, шунингдек, Россия қонунчилиги тарихи ва асослари бўйича имтиҳон нархи ҳар бир тест учун 2,95 минг рублни (37,5 доллар) ташкил қилади. Вақтинчалик яшаш рухсатномаси ёки доимий яшаш рухсатномасини олиш учун имтиҳон топшириш нархи 5,9 минг рубль (75 доллар) ташкил этади. Ишга рухсатнома ёки патент олиш учун ариза топширишда худди шу фанлар бўйича билимларни текшириш 3,8 минг рубль (48 доллар) туради.
