газета-вся-тверь.рф сайти фотосурати
Жорий йил январь-май ойларида меҳнат мигрантларига патент сотишдан Россия бюджетига ўтказилган шахснинг даромад солиғи (ШДС) миқдори 63 миллиард рублни (804,5 миллион доллар) ташкил этди. Бундай статистик маълумотлар Санкт-Петербург халқаро иқтисодий форумида РФ Ички ишлар вазирлигининг Миграция бош бошқармаси бошлиғи Валентина Казакова томонидан келтирилди, деб хабар беради «Интерфакс».
Ички ишлар вазирлиги маълумотларига кўра, бу кўрсаткич 2024 йил биринчи беш ойи давомида қайд этилган кўрсаткичдан 35 фоизга кўпдир.
Казакова таъкидлашича, ишлаш рухсатномаси учун тўланадиган ШДС миқдори анчагина катта. Шу тариқа, ўтган йили мигрантлар мамлакат ғазнасига 124 миллиард рубль (тахминан 1,6 миллиард доллар) олиб келган.
«РФ субъектлари буни чет элликлар патент олиш учун ҳар ой тўлайдиган аванс тўловлари ҳисобидан олади», — дея тушунтирди мулозима.
ИИВ вакили жорий йили Россияда 3 миллионга яқин мигрант меҳнат қилаётганига оид маълумотларни келтирди. Шундан 800 минг киши қурилишда, 350 минг киши улгуржи ва чакана савдода, шунингдек, ишлаб чиқариш корхоналарида банд. Яна 193 минг хорижлик транспорт ва омборларда, 63 минг нафари қишлоқ хўжалигида меҳнат қилмоқда.
Казакова, шунингдек, ўтган йили мамлакатга 6,3 миллион хорижий фуқаро келганини айтди. Унинг сўзларига кўра, бу кўрсаткич пандемиядан олдинги қийматларга мос келади. Шу билан бирга, муҳожирларнинг ярми Россия Федерациясига ташриф буюриш мақсадини «ишлаш» деб кўрсатган. Расмийнинг қўшимча қилишича, Россияда 700 мингга яқин мигрант ноқонуний яшаган, шундан 157 минг киши депортация қилинган.
Агар 2024 йили энг кўп меҳнат мигрантлари келган давлатлар ҳақида гап кетса, бу ерда Марказий Осиё республикалари етакчи ҳисобланади. Ўзбекистонга мигрантлар умумий сонининг 23,3 фоизи, Тожикистонга – 16,7 фоизи, Қирғизистонга – 10,4 фоизи тўғри келади.
Жорий йил 5 февралидан бошлаб Россияда назорат остидаги шахслар реестри ишга туширилди, унга мамлакатда бўлиш қоидаларини бузган хорижликлар киритила бошланди. Рўйхатга киритиилган фуқароларга нисбатан бир қатор чекловлар жорий этилади, хусусан, уларнинг яшаш жойини ўзгартириши, никоҳ, кўчмас мулк ёки автомобил сотиб олиши борасида. Электрон тизим ИИВ сайти ва давлат хизматлари порталида ишлайди, махсус интерактив форма орқали маълумотларни бепул кўриш мумкин.
Шундай қилиб, Казакова айтган маълумотларга кўра, бугунги кунда қарийб 800 минг мигрант қонунбузарлар қора рўйхатга киритилган. Февраль ойида, вазирлик хабарига кўра, 670 мингга яқин шундай хорижликлар қайд этилган.
Эслатиб ўтамиз, яқинда ИИВ раҳбари Владимир Колокольцев жамиятга фойда келтирмайдиган мигрантларни Россиядан чиқариб юборишни таклиф қилган эди.
«Ишини йўқотган, университетдан ҳайдалган, бармоқ изидан ўтмаган, тил ўрганмаётган, Россия жамиятига фойда келтирмаётганлар мамлакатимизни тарк этиши керак», — деди вазир.
Шунингдек, у Ички ишлар вазирлигида мигрантлар билан боғлиқ Россия Федерацияси ичидаги вазиятни беқарорлаштиришга уринишларга жавоб беришнинг «рецепти» борлигига айтди. Биринчидан, мигрантлар ўртасидаги жиноятчиликка қарши тизимли кураш, фаол ишлар олиб бориш зарур. Иккинчидан, айбдорлар учун жазо муқаррарлигини таъкидлаган ҳолда хавфсизлик кучлари томонидан кўрилган чора-тадбирлар натижаларини фаол ва конструктив тарзда ёритиш зарур, дея хулоса қилди Колокольцев.
