Қамчибек Ташиев. ҚФИ матбуот хизмати фотосурати
Қирғизистон футбол иттифоқи (ҚФИ) ҚФИ раҳбари ва Республика Миллий хавфсизлик давлат қўмитаси раиси Қамчибек Ташиевнинг Словакиянинг «Тренчин» футбол клубидаги улушлари ҳамда бошқа жамоаларнинг қимматли қоғозларига эга экани ҳақидаги маълумотларни рад этди. Бу ҳақда спорт ташкилотининг Телеграм-каналида эълон қилинган баёнотда сўз юритилади.
Аввалроқ Словакия ОАВлари Ташиев «Тренчин» клуби акцияларининг 10 фоизини сотиб олгани ҳақида хабар берган эди. ФК директори Роберт Рибничек ҳам қирғизистонлик инвестор жамоани банкротликдан қутқариб қолганини айтганди. Словакиялик футбол эксперти Коник Ташиевнинг лойиҳадаги фаол иштирокини таъкидлаб, буни «Тренчин» аризасига махсус хизмат раҳбарининг ўғли Эмирхон Қидиршаев киритилгани билан изоҳлаганди.
«Бу маълумот ҳақиқатга тўғри келмайди. Қамчибек Ташиев ҳеч қандай хорижий ёки маҳаллий футбол клуби, жумладан «Тренчин»нинг акциядори эмас», — дейилади ҚФИ баёнотида.
Ташиев «Тренчин»ни банкротликдан қутқариб қолганми ва бу ишни қандай қилиб амалга оширган, бу ҳақда баёнотда айтилмаган. Бироқ, бу маълумот инкор ҳам этилмайди.
Шу билан бирга, ҚФИ ва унинг раҳбарлари халқаро ҳамкорликни йўлга қўйиш устида иш олиб бораётгани, унинг асосий мақсади сармоя жалб этиш, хорижий тажрибани қўллаш, маҳаллий футболни ривожлантириш учун малакали хорижлик мутахассислардан фойдаланишини таъкидланган.
«Барча халқаро алоқалар, жумладан, турли хорижий футбол клублари билан ҳам миллий манфаатлар асосида йўлга қўйилган», — дея таъкидлайди футбол иттифоқи.
Матбуот хизмати, шунингдек, ҚФИнинг халқаро ҳамкорлик соҳасидаги ютуқларини санаб ўтади:
✅ Барcелона ФК (Испания) билан ҳамкорлик ва Жалолобод шаҳрида «Барса» академиясининг очилиши.
✅ Дунёнинг энг кучли лигаларидан бири — Англия Премьер-лигаси вакили «Астон Вилла» (Англия) футбол клуби билан алоқалар.
✅ «Тренчин» (Словакия) билан расмий ҳамкорлик қирғизистонлик икки футболчига клуб таркибида машғулотлар ўтказишга рухсат берган. Қолаверса, бир нафар мураббий клуб тузилмасида машғулотлардан ўтмоқда ва келажакда қирғизистонлик мураббийларнинг малакасини ошириш учун уларнинг бундай амалиётларда мунтазам иштирок этиши режалаштирилган.
