sputniknews.uz сайти фотосурати
Туркиянинг Anadolu Isuzu компанияси Ўзбекистон давлатининг Самарқанд автомобил заводи (SamAuto) қўшма корхонасидаги 75,2 фоиз улушини 80 миллион долларга сотиб олишга рози бўлди. Бу ҳақда Марказий Осиё республикаси Давлат активларини бошқариш агентлиги матбуот хизмати хабар берди.
Агентликнинг аниқлик киритишича, инвесторнинг нарх таклифи битимнинг молиявий маслаҳатчиси KPMG халқаро фирмаси томонидан белгиланган диапазонда, шунингдек, PwC мустақил баҳоловчиси ҳисоб-китобларига мос келади.
Туркиялик ҳамкорлар Самарқанд заводидаги давлат улушини 80 миллион долларга сотиб олишдан ташқари, кейинчалик заводни ривожлантириш учун ҳам худди шундай маблағ йўналтиради.
Хусусан, Anadolu Isuzu Ўзбекистонда катта сиғимли (12-18 метр) автобуслар ва электробуслар ишлаб чиқаришни йўлга қўйиш, бутун мамлакат бўйлаб лицензияланган сервис марказларини ташкил этиш, маҳсулотларни Марказий Осиё, Жанубий Кавказ, Яқин Шарқ ва Африка мамлакатларига экспорт қилиш мажбуриятини олади. Ушбу ташаббус Ўзбекистонда минтақавий транспорт хабини ташкил этишга хизмат қилади.
Ўзбекистон Давлат активларини бошқариш агентлиги вакиллари Самарқанд автомобил заводи улушини сотиш хусусийлаштириш дастури доирасида амалга оширилаётганини қўшимча қилди. Таъкидланишича, қўшма корхона эгалари қаторига Япониянинг Itochu ва Isuzu Motors компаниялари киради, уларнинг ҳар бири 12,4 фоизни назорат қилади. Расмийларга кўра, Қуёш чиқар мамлакати корпорациялари Ўзбекистоннинг SamAutoдаги давлат улушини турк компаниясига сотиш ғоясини қўллаб-қувватлаган.
Бироқ, битимни якунлаш учун Туркиянинг назорат органларининг рухсати ҳам талаб қилинади, дея таъкидлайди Ўзбекистон Давлат активларини бошқариш агентлиги.
ℹ️ Anadolu Isuzu компанияси 1965 йили Anadolu Group (Çelik Montaj) холдинг компанияси таркибида ташкил этилган. Дарвоқе, ушбу холдинг компанияси Ўзбекистонда фаолият юритиш тажрибасига эга. 2021 йили турк компанияси Coca-Cola Ichimligi Uzbekistan МЧЖнинг 57,1 фоиз давлат улушини 252,2 миллион долларга сотиб олганди. Кейинчалик хорижлик инвестор компанияни ривожлантириш учун 250 миллион долларга яқин сармоя киритди, иккита йирик завод қурди ва битта ишлаб чиқариш биносини модернизация қилди.
ℹ️ Самарқанд автомобил заводи 1996 йили Туркиянинг Koc Holding компанияси билан ҳамкорликда «АвтоВАЗагрегат» корхонаси ҳудудида ташкил этилган. Бугунги кунда қўшма корхона Isuzu шассисидан фойдаланган ҳолда юк автомобиллари ва автобуслар, шунингдек, Isuzu D-Max пикапларини ишлаб чиқаради.
