25 ноябрь куни Бишкек шаҳар суди апелляция шикоятини кўриб чиққандан сўнг, собиқ Kloop операторлари Александр Александров ва Жоомарт Дуулатовнинг жазо муддатини ўзгартирди. Уларнинг беш йиллик қамоқ жазоси уч йиллик шартли озодликка алмаштирилди ва операторлар судда озод қилинди, деб хабар берди Kloop.
Қирғизистон пойтахтидаги Первомайский туман суди худди шу иш бўйича судланган нашрнинг икки бухгалтери жазосини ўзгартирмади – уларга уч йиллик шартли жазо берилганди.
Шу йил сентябрь ойида собиқ Kloopнинг тўрт нафар ходими судланган. Айбловга Қирғизистондан депортация қилинган терговчи журналист Болот Темиров бошқарадиган Temirov Live каналида жойлаштирилган видеолар сабаб бўлган. Тергов собиқ «Клооп» ходимлари ушбу материалларни тайёрлаш ва тарқатишда иштирок этганини иддао қилган, гарчи операторлар ва бухгалтерлар мазкур видеоларни суратга олиш ёки чоп этилишига алоқадорлигини рад этишганига қарамай. Мутахассислар видеоларда тартибсизликларга тўғридан-тўғри чақириқлар топмаганлар. Шунингдек, Темиров каналининг «Озодлик берилмайди, озодлик қўлга киритилади» шиори «Клооп» билан боғлиқ эмаслиги таъкидланган.
Суд мажлисида Kloopнинг собиқ ходимлари ўз айбини тан олишмаган ва тергов томонидан босим ўтказилганини даъво қилишган. Александров уй қамоғига олиш учун «ўзини ўзи туҳмат қилишга» мажбур бўлганини айтган, Дуулатов эса қамоқ жазоси таҳдиди остида иқрорнома имзолаганини таъкидлаган.
Шунга қарамай, судланувчилар Қирғизистон Жиноят кодексининг 40-моддаси («Жиноят содир этган шахс») ва 278-моддасининг 3-қисми («Ҳукумат амалдорларининг қонуний талабларига фаол бўйсунмаслик ва оммавий тартибсизликлар уюштиришга чақириқлар, шунингдек, фуқароларга нисбатан зўравонлик қилишга чақириқлар») бўйича айбдор деб топилган.
ℹ️ Kloop таҳририяти бир неча йиллардан бери мунтазам босим остида. 2023 йил кузида нашрнинг сайти блокланди ва 2024 йил февраль ойида суд лойиҳанинг юридик шахси — Kloop Media жамоат фондини тугатди. 2025 йил октябрь ойида Бишкекнинг Октябрь туман суди Temirov Live, Kloop.kg ва «Айт айт десе»ни экстремист деб эълон қилди.
