Туркманистонда совғани кўзга суртиш ҳурмат ҳисобланади. hronikatm.com сайти фотосурати
Туркманистон президенти Сердар Бердимуҳамедов Халқаро хотин-қизлар куни муносабати билан мамлакатдаги аёлларга 60 манат (қора бозор курси бўйича 3 доллар) тарқатишни буюрди. Бу ҳақда ТДХ нашри хабар берди.
Шу тариқа расмийлар «мамлакат фаровонлиги йўлида ислоҳотларни амалга оширишда, Ватанга содиқ соғлом ва жўшқин авлодни тарбиялашда, қудратли давлатнинг янги Уйғониш даврида аждодларнинг севимли оналари ва азиз опа-сингиллари каби олижаноб анъаналарни давом эттиришдаги аёлларимизнинг улкан ҳиссасини» эътироф этдилар.
2-мартдан 6-мартгача қуйидаги аёлларга пул мукофотлари тарқатилади:
▪️ мулкчилик шаклидан қатъи назар, корхоналар, муассасалар ва ташкилотларда ишлайдиган;
▪️ пенсия ва давлат нафақаларини оладиган;
▪️ ишдан бўшатилган ҳолда аспирантурада, докторантурада ёки клиник ординатурада ўқиётган;
▪️ Туркманистон президенти ҳузуридаги Давлат бошқаруви академиясида камида икки йил давомида курсларда ўқиётган;
▪️ мактаб ва университетларда таҳсил олаётган;
▪️ мактабгача таълим муассасаларига ишлаётган аёлларга.
Туркманистонда кетма-кет еттинчи йил 8-март шарафига ҳар бир аёлга 60 манатдан берилмоқда, гарчи мамлакатда озиқ-овқат ва бошқа товарлар нархи 2019 йилдан бери сезиларли даражада ошган бўлса ҳам. Масалан, 2019 йили март ойида мол гўшти килограмми 22 манатдан сотилган, 2026 йил январига келиб бу нарх 110 манатга кўтарилган. Маҳаллий олмаларнинг бир килоси 6 дан 26 манатгача ошган.
2019 йилгача 8 март учун президент совғаси 40 манат (расмий курс бўйича 11,4 доллар) бўлган.
Туркманистонда энг кам иш ҳақи 2019 йили 790 манатни, 2025 йили 1410 манатни ташкил этган. 2026 йили иш ҳақи оширилмаган. 2025 йил сентябрь ойида бир оқсоқол «мамлакат аҳолисининг ижтимоий ва турмуш шароити юқори даражага етгани сабабли» тўловларнинг ошишини тўхтатишга чақирганди.
Манатнинг расмий курси 2015 йилдан бери ўзгаришсиз қолган: бир доллар учун 3,5 манат. Бугунги кунда реал ёки қора бозор курси бўйича 1 доллар 19,5 манатни ташкил этади. Бу шуни англатадики, ҳукуматнинг нақд пул совғаси расмий курс бўйича 17 доллар эмас, балки атиги 3 долларга тенг.
