Бишкекнинг Первомайский тумани суди биноси. aki.kg сайти фотосурати
Қирғизистонлик Мээрим Узакбаева 1993 йили, давлат корхонасини хусусийлаштириш билан боғлиқ коррупцияда гумон қилиниб ҳибсга олинди. Айбланувчи у пайтда 10 ёшда бўлган. Бу ҳақда 24.kg нашри адвокат Ақинбек Ногоевга таяниб хабар берди.
Узакбаева собиқ Қишлоқ хўжалиги вазири ва Қирғизистоннинг Ўзбекистондаги собиқ элчиси Эмилбек Узақбаевнинг қизи. Унинг отаси ҳозирда «75-иши» деб номланган жиноий иш бўйича ҳибсда.
Ногоевнинг сўзларига кўра, 1993 йилда, оммавий хусусийлаштириш тўлқини пайтида Эмилбек Узақбаев Бишкекнинг Сидигалиев кўчасида жойлашган «Қирғизайилкомок» компаниясининг бошланғич 0,5% улушини сотиб олган. Кейинги 30 йил ичида у аста-секин бошқа акциядорлардан акцияларни сотиб ола бошлаган. Ҳозирда Узақбаевлар оиласи компания акцияларининг 63% га эгалик қилади.
Адвокатнинг таъкидлашича, барча битимлар расмий ҳужжатлар билан тасдиқланган. У ўша пайтда ўн ёшли қизни коррупцияда айблашга уринишни бемаънилик деб атайди.
Ногоевнинг таъкидлашича, Мээрим Узақбаева ҳозирда компанияда акцияларга эгалик қилмайди. У фақат 2017 йилда «Қирғизайилкомок» очиқ акциядорлик жамияти (ОАЖ) бош директори бўлган.
Адвокат бу иш қўзғатилишини иккита асосий мотив билан боғлайди. Бир томондан, компания ҳудуди 10 гектардан ортиқ майдонни эгаллайди ва бу ер турар-жой қурилиши учун мос келади. «Давлат бу ерга кўз тикиши мумкин ва мазкур иш шу ер манфаатлари туфайли очилган», — деб тахмин қилдаи Ногоев.
Бошқа томондан, адвокат Узақбаеванинг ҳибсга олинишини отасига босим ўтказилаётгани билан боғлайди.
«Мээримнинг отаси ҳозирда «75 иши» бўйича ҳибсда, шунинг учун унинг қизининг ҳибсга олиниши уни маълумот олишга мажбурлаш учун ишлатилиши мумкин, гарчи Эмилбек Узақбаев аллақачон билган ҳамма нарсани айтиб берган бўлса ҳам», — деб таъкидлайди ҳимоячи.
Ногоев шунингдек, улар бу вазият бўйича шахсан президентга мурожаат қилганликларини хабар қилди. Бироқ, шикоят охир-оқибат тергов органларига қайтарилган.
Адвокат коррупцияда бевосита айбланаётганлар озодликда қолаётган бир пайтда, учта вояга етмаган болани тарбиялаётган ёлғиз она қамоққа юборилаётганидан ғазабда эканини айтади.
Ҳимоячининг таъкидлашича, тергов деярли икки ойдан бери давом этмоқда ва бу вақт ичида ҳеч қандай тегишли чоралар кўрилмаган.
«Азаттиқ» (Озодлик радиосининг қирғиз хизмати) хабарига кўра, Бишкекнинг Первомайский туман суди Узақбаеванинг ҳибсда сақлаш муддатини яна икки ойга узайтирган. У Бишкекнинг Тоголок Молдо кўчасидаги беш қаватли бинони, «Қирғизойилкомок» аксиядорлик жамиятига тегишли 9 гектарлик мулк ва ерни, шунингдек, Маҳатма Ганди кўчасидаги «Баят» бозорини 9 гектарлик ер участкаси билан бирга ноқонуний равишда хусусийлаштиришда айбланмоқда.
Аввалроқ, Жогорку Кенеш (Қирғизистон парламенти) аъзолари ўнлаб йиллар ўтгач, эски битимларни қайта музокара қилиш амалиётини танқид қилиб, ҳалол харидорлардан мулкни тортиб олишни «давлат даражасидаги рейдерлик» дея аташган эди.
