Жаҳон чемпионати олдидан Эронга ажратилган мухлислар чипталари квотаси мезбон давлатлардан бири — АҚШ босими остида бекор қилинди. Бу ҳақда Tasnim хабар берди.
ФИФА қоидаларига кўра, миллий терма жамоалар федерациялари ҳар бир ўйин учун стадион сиғимининг 8 фоизини ўз мухлислари ўртасида тақсимлаш учун оладилар. Тегишли квотани олган Эрон футбол федерацияси (ЭФФ) миллий терма жамоанинг Янги Зеландия, Бельгия ва Мисрга қарши ўйинлари учун чипталарни ўзининг расмий сайти орқали сотишни бошлаган. Бироқ, Жаҳон чемпионати бошланишидан уч кун олдин федерация чипталарни сотиш имкониятидан маҳрум бўлган.
ЭФФ квотанинг бекор қилинишини қоралаб, мухлисларни чипта сотиб олиш ҳуқуқидан маҳрум қилиш халқаро мусобақалар руҳига ва иштирокчи давлатлар ўртасидаги тенглик тамойилига зид эканини таъкидлади.
«Бундай қадам дунёдаги энг йирик футбол турнирини ташкил этишда спортга алоқадор бўлмаган ва сиёсий мулоҳазалар роли ҳақида жиддий саволларни туғдиради», — дейилади PressTV сайтида эълон қилинган ЭФФ баёнотида.
Федерация ФИФА ва 2026 йилги Жаҳон чемпионати ташкилотчиларини «холислик, адолат ва белгиланган қоидаларга риоя қилишга ва сиёсий мотивацияга асосланган ташаббуслар дунёдаги энг йирик футбол тадбирига соя солишига йўл қўймасликка» чақирди.
АҚШ ва Исроил Эронга қарши ракета ҳужумларини бошлаганидан сўнг, Эрон терма жамоасининг Жаҳон чемпионатидаги иштироки шубҳа остида қолганди. ЭФФ илтимосига биноан, Эрон терма жамоасининг базавий лагери жамоанинг АҚШдаги иштирокини минималлаштириш учун Аризонадан Мексикага кўчирилди. Шу билан бирга, Эрон терма жамоасининг учта ўйини Қўшма Штатларда бўлиб ўтади: биринчиси 16 июнь куни Лос-Анжелесда Янги Зеландияга қарши, кейин 21 июнь куни Бельгияга қарши, сўнг 27 июнь куни Сиэтлда Мисрга қарши ўйин бўлиб ўтиши режалаштирилган.
Эрон делегацияси биринчи ўйиндан атиги ўн кун олдин виза ололди ва унинг баъзи ходимлари, жумладан, ЭФФ раҳбари Меҳди Тажга Қўшма Штатларга киришга рухсат берилмаган. Аввалроқ, Давлат котиби Марко Рубио АҚШ Эронга Ислом инқилоби қўриқчилари корпуси (ИИҚК) билан боғлиқ шахсларни Жаҳон чемпионати делегациясига киритишга рухсат бермаслигини айтган эди.
Жаҳон чемпионати 11 июнда бошланади ва учта мамлакатда — АҚШ, Канада ва Мексикада бўлиб ўтади. Reuters таъкидлашича, бу 1930 йили ташкил этилганидан бери мезбон мамлакат ўзи билан уруш ҳолатида бўлган давлатни қабул қилиши керак бўлган биринчи Жаҳон чемпионати ҳисобланади.
