crypto.ru сайти фотосурати
Қозоғистон Миллий банки криптовалюталарни алмаштириш фаолиятини амалга ошириш учун биринчи лицензияни берди. Ҳужжатни Pax Finance компанияси олган, деб хабар қилди молия бозори регулятори ўзининг Telegram-каналида.
Ушбу компания криптоактивларни сотиб олиш, сотиш ва сақлаш, шунингдек, филиаллар очиш ва криптоматлар ўрнатиш ҳуқуқига эга бўлади.
Миллий банк эслатилишича, жорий йил 1 майдан бошлаб Қозоғистонда рақамли активлар бозори иштирокчиларини лицензиялаш тизими амал қилмоқда. Иш фаолияти учун рухсатномалар олиш ва ҳисобга олиш рўйхатидан ўтказиш масалалари молиявий регулятор ваколатига киради.
Forbes Kazakhstan маълумотларига кўра, ТОО Pax Finance муассислари уч нафар шахсдан иборат:
▪️ Арман Батаев — аудитор, OD Consulting бошқарувчи партнёри, Finmentor.kz Telegram-канали асосчиси.
▪️ Азат Бекмағамбетов — бизнесмен, Paxaro Labs ҳаммуассиси ва PaxWallet.io криптоҳамён асосчиларидан бири;
▪️ Орингүл Есжанова — тадбиркор, Қозоғистоннинг Атирау вилоятидаги нефть сервис компаниялари билан боғлиқ фаолият юритади.
Қозоғистон қонунчилигига кўра, криптовалюта билан ишлаш учун лицензия олишда корхоналарнинг устав капитали камида 50 млн тенге (105,7 минг АҚШ доллари) бўлиши, рискларни бошқариш тизими, комплаенс назорат, шунингдек, мижозларни идентификация қилишнинг замонавий тартиблари ва киберхавфсизлик чораларини қўллаши талаб этилади. Шу билан бирга, Миллий банк лицензия беришдан олдин ариза берувчи компания муассислари ва бенефициарларининг обрўсини текшириш мажбуриятига эга.
Ўтган йил июнь ойида регулятор «Астана» халқаро молия маркази криптобиржаларидаги ҳамёнларга боғланган ҳолда нақдсиз транзакцияларни амалга ошириш имконини берувчи криптокарта тўлов лойиҳасини бошлаган. Унда бир нечта криптохизматлар, жумладан Binance’нинг маҳаллий бўлинмаси ва Bybit биржаси рўйхатдан ўтгани қайд этилган.
