Тасвир нейротармоқ ёрдамида олинди
Туркиянинг DİLAHAN TURİZM компанияси «Андижон» футбол клуби Анталияда ўтказилган учта ўқув-машғулот йиғини учун унга 69,9 минг евро қарздор эканини маълум қилди. Тегишли хат нусхаси «Фарғона» таҳририятига келиб тушган.
Ҳужжат 2026 йил 2 июнь санаси билан расмийлаштирилган бўлиб, у Andijon Viloyat PFK МЧЖ бош директори Зиёд Машраповга йўлланган. Хатга DİLAHAN TURİZM директори Режеп Шамил Яшажан имзо чеккан.
Туркия компанияси маълум қилишича, у 2026 йил мавсуми бошланишидан олдин «Андижон» учун учта қишки ўқув-машғулот йиғинини ташкил этган.
Биринчи йиғин 7 январдан 21 январгача Белекдаги беш юлдузли Papillon Belvil меҳмонхонасида бўлиб ўтган. Унинг қиймати 90 334 еврони ташкил этган.
Иккинчи йиғин 24 январдан 5 февралгача Susesi Luxury Resort меҳмонхонасида ўтказилган ва 89 588 еврони ташкил қилган.
Тайёргарликнинг учинчи босқичи 5 февралдан 18 февралгача Calista Luxury Resortда бўлиб ўтган. Ушбу хизмат учун клубга 100 219 евролик ҳисоб тақдим этилган.
Хизматларнинг умумий қиймати 280 141 еврони ташкил этган. DİLAHAN TURİZM маълумотларига кўра, «Андижон» клуби 210 219 евро тўлаган, қолган қарз эса 69 922 еврога етган.
Туркия компанияси шартномаларда кўзда тутилган тўлов муддатлари тугаганини маълум қилади. У қарзни тўрт кун ичида тўлаш ҳамда маблағ ўтказиш муддатлари кўрсатилган кафолат хатини юборишни талаб қилган.
Агар тўлов амалга оширилмаса, DİLAHAN TURİZM судга мурожаат қилиш ва клубдан кечиктирилган тўлов учун фоизлар, суд харажатлари ҳамда юридик хизмат харажатларини ундиришини билдирган. Хатда шунингдек, қарз ўз вақтида қопланмагани сабабли компания меҳмонхоналарга тўловлар қилишда, шунингдек солиқ ва бошқа молиявий мажбуриятларни бажаришда қийинчиликларга дуч келаётгани қайд этилган.
«Фарғона» таҳририяти «Андижон» футбол клубига ўз позициясини баён қилиш имкониятини тақдим этишга тайёр. Клуб вакиллари ўз изоҳларини бош муҳаррир Даниил Кисловга электрон почта орқали dan.kislov@gmail.com манзилига юборишлари ва шу билан бирга таҳририятнинг ferghananews@gmail.com почтасига ҳам йўллашлари мумкин.
