Ўзбекистон президенти матбуот хизмати фотосурати
Ўзбекистон президенти Шавкат Мирзиёев айрим раҳбарларнинг фаолиятини танқид қилди. Унинг сўзларига кўра, айрим раҳбарлар маҳаллаларга чиқмасдан, ҳар бир оила ва ҳар бир корхонадаги ҳақиқий вазиятни ўрганмасдан, ишни кабинетлардан туриб ташкил этишга уринмоқда. Бу ҳақда президент матбуот хизмати хабар берди.
9 сентябрь куни бўлиб ўтган йиғилишда давлат раҳбари бундай ёндашув натижа бермаслигини таъкидлади. У ҳокимлардан камбағаллик масаласига фақат ижтимоий реестр нуқтаи назаридан қарамаслик зарурлигини таъкидлади.
Президент таъкидлашича, Ижтимоий реестр аҳолини қўллаб-қувватлаш воситаси ҳисобланади. Камбағалликни қисқартириш эса оилаларни барқарор даромад манбаи билан таъминлаш, иш ўринлари яратиш, инфратузилма ва зарур шароитларни шакллантириш билан боғлиқ.
Янги тизимга кўра, ҳар бир вилоят ва туманда ҳокимлар раҳбарлигида штаблар ташкил этилади. Улар бандлик органлари ва иқтисодий тузилмалар билан биргаликда аҳолини иш билан таъминлаш ҳамда даромадларини ошириш масалаларини бевосита жойларда ҳал қилиши керак. Уларнинг фаолиятини самарали ташкил этиш учун ҳар бир вилоятга иккитадан масъул раҳбар бириктирилди. Жами 28 нафар иқтисодий комплекс вакили масъул этиб белгиланди.
Йиғилишда, шунингдек, маҳаллалар билан ишлаш бўйича Бош вазир ўринбосари лавозими жорий этилгани маълум қилинди. Ушбу лавозимга Ғафуржон Мирзаев тайинланди. Унинг зиммасига ҳокимлар, туман идоралари, «маҳалла еттилиги» ва банклар фаолиятини ягона тизим асосида мувофиқлаштириш, шунингдек, улар фойдаланаётган электрон платформаларни интеграция қилиш вазифаси юклатилди. Энди маҳаллага оид масалалар бўйича тарқоқ йиғилишлар ўтказилишига йўл қўйилмайди — барча масалалар ҳафтада бир марта Бош вазир ўринбосари раислигида кўриб чиқилади.
Эслатиб ўтамиз, 2026 йил Ўзбекистонда «Маҳаллаларни ривожлантириш ва жамият фаровонлиги йили» деб эълон қилинган. Ҳукумат давлат бошқаруви ва суд-ҳуқуқ тизимидан тортиб иқтисодиёт, таълим, тиббиёт, маданият, спорт ва экологиягача бўлган барча соҳаларда туб ўзгаришларни амалга оширишни режалаштирган. Белгиланган вазифаларни бажариш учун алоҳида давлат режаси қабул қилинди. Унга кўра, ҳар бир ҳудудда инфратузилма муаммоларини комплекс ҳал этиш ва бизнес учун шароит яратиш мақсадида иккитадан учтагача туман танлаб олинади. Бу мақсадларга барча манбалар ҳисобидан 8,5 триллион сўм ($708,3 млн) маблағ йўналтирилади. Бундан ташқари, 2026 йил 1 январдан бошлаб Тошкент шаҳри бюджетига қўшилган қиймат солиғи (ҚҚС) тушумларининг 5 фоизи, бошқа ҳудудларда эса 20 фоизи қолдирилади. Ушбу маблағларнинг ярми туман бюджетларига тўғридан-тўғри ўтказилади. Шунингдек, қишлоқ хўжалиги ерларини ижарага беришдан тушадиган даромадлар ва бозорлар фойдаси тўлиқ туманлар ихтиёрига ўтказилади. Бу маҳаллалар инфратузилмасини яхшилаш учун қўшимча 5 триллион сўм ($416,6 млн) ресурс шакллантириш имконини беради.
