Мансур Мовлаев. Ижтимоий тармоқдан олинган фотосурат
Россияга экстрадиция қилиниш хавфи остида Қозоғистонда бўлиб турган чеченистонлик фаол Мансур Мовлаев иккинчи бор ўз жонига қасд қилишга уринди. Бу ҳақда Россия Антивоенный қўмитаси маълум қилди. Ҳодиса у Олмаота СИЗОсидаги биринчи уринишдан сўнг ётқизилган шифохонада содир бўлган.
Мовлаевни қўллаб-қувватловчи гуруҳ маълумотига кўра, у шифохонада бўйин соҳасини кесган. Суисақсдга иккинчи бор уринишдан сўнг унинг аҳволи ҳақида ҳозирча маълумот йўқ.
Мовлаев биринчи марта 15 сентябрь куни тергов ҳибсхонасида ўз жонига қасд қилишга уринган. Фаол ўзининг эҳтимолий Россияга экстрадиция қилиниши билан боғлиқ қарорини изоҳловчи васиятнома қолдирган.
«Мени кечиринг, мен адолатсизликдан чарчадим! На суд, на прокуратура бизни эшитмаяпти! Улар [қодировчилар] мени қийнайди, азоблайди ва ўлдиради, кейин эса ўз жонига қасд қилди, деб айтишади. Мен энди ўзимни қийнашларига йўл қўймайман! 16 ой давомида экстрадиция бўлиш қўрқуви ва умид билан яшадим… Ҳозир эса фақат қўрқув!» — деб ёзган Мовлаев.
У қолдирган хатида, шунингдек, ўзини Қозоғистонда дафн этишларини ва Олмаота СИЗОсида у билан бирга сақланаётган ҳамда Россияга экстрадиция қилиниши мумкин бўлган россиялик фаол Юлия Емельяновага ёрдам беришларини сўраган.
Қозоғистон ҳукумати аввалроқ Мовлаевга қочқин мақомини беришни рад этган. Маъмурий ишлар бўйича кассация суди унга бошпана беришни рад этган қуйи судлар қарорларини ўзгаришсиз қолдирган. Шу билан бирга, 23 февраль куни БМТнинг Инсон ҳуқуқлари бўйича қўмитаси Қозоғистонни Мовлаев шикоятини рўйхатга олиб, мурожаат кўриб чиқилгунга қадар фаолни Россияга экстрадиция қилишдан тийилишга чақирган.
Мансур Мовлаев Рамзан Қодиров режимига қарши чиқувчи «Адат» мухолифат ҳаракати иштирокчиси. 2020 йилда фаол Россияда гиёҳвандлик воситаларининг ноқонуний айланмаси бўйича судланган. Чеченистонлик фаоллар бу иш сохталаштирилганини таъкидлайди.
2022 йилда муддатидан илгари шартли равишда озод қилинганидан сўнг, Мовлаевнинг айтишича, у чечен полицияси ходимлари томонидан ўғирланган ва махфий қамоқхонада сақланган. Кейинчалик у Қирғизистонга, у ердан эса Қозоғистонга қочиб ўтишга муваффақ бўлган. Бу орада Россияда унга нисбатан экстремизм иши бўйича федерал қидирув эълон қилинган.
2025 йил май ойида фаол Москва сўровига асосан Олмаотада қўлга олинган ва экстрадиция ҳибсхонасига жойлаштирилган.
