«Шахтёр» ФК, «Шахтёр» ФК фотосурати
22 октябрь куни Қозоғистоннинг Қарағанда шаҳрининг «Шахтёр» футбол клубига Қозоғистон Биринчи лигасидаги ғалабаси учун кубок ва олтин медаллар топширилди. Келаси мавсумда мамлакатнинг энг кўп соврин қўлга киритган клубларидан бири яна Премьер-лигада (ҚПЛ) иштирок этади.
Тақдирлаш маросими 22 октябрь куни мавсумнинг сўнгги учрашуви — «Қайрат-Жастар»га қарши ўйиндан кейин бўлиб ўтди. Қарағандаликлар ўз майдонида 2:3 ҳисобида мағлуб бўлишди, аммо 65 очко тўплаб, чемпионатни биринчи ўринда якунлашди. 63 очко билан «Қайрат-Жастар» иккинчи ўринни эгаллади. Бироқ, у фарм-клуб бўлгани сабабли Премьер-лигада иштирок эта олмайди. ҚПЛга йўлланма олган яна бир жамоа — Туркистоннинг «Туран» клуби бўлди.
Биринчи лиганинг энг яхши тўпурари «Шахтёр» ҳужумчиси Артём Литош бўлди. У рақиблар дарвозасига 24 та гол урди. Футболчи илк бор Қозоғистон миллий терма жамоасига чақирув олди.
«Шахтёр» икки мавсумлик танаффусдан сўнг олий дивизионга қайтмоқда. 2024 йилда қарағандаликлар ҚПЛда охирги, 13-ўринни эгаллаб, мустақил Қозоғистон чемпионати ташкил этилганидан бери илк бор элитадан тушиб кетишганди. Унга қадар клуб 1992 йилдан бошлаб олий дивизионда узлуксиз иштирок этиб келган. Кейинги мавсумда «Шахтёр» Биринчи лигада тўртинчи ўринни эгаллади ва биринчи уринишдаёқ юқори дивизионга қайта олмади.
Қарағанда клуби Қозоғистон чемпиони унвонини икки марта — 2011 ва 2012 йилларда қўлга киритган. 2013 йилда эса «Шахтёр» мамлакат Кубоги ва Суперкубогида ғолиб бўлган. Шунингдек, клуб чемпионатнинг бронза медалларини уч марта — 1995, 2007 ва 2009 йилларда қўлга киритган.
Клубнинг халқаро майдондаги энг катта муваффақияти ҳам 2013 йилга тўғри келади. Чемпионлар лигаси саралаш босқичида Виктор Кумуков бошчилигидаги жамоа БАТЭ ва Албаниянинг «Скендербеу» клубларини мағлуб этди. Плей-офф босқичида эса ўз майдонида «Селтик»ни 2:0 ҳисобида енгди, аммо Глазгода ўтказилган жавоб учрашувида 0:3 ҳисобида мағлуб бўлди. Шундан сўнг «Шахтёр» Европа лигасининг гуруҳ босқичида иштирок этди ва еврокубокларнинг гуруҳ босқичига чиққан илк Қозоғистон клубига айланди.
Бу галги муваффақият клуб хусусий мулкка ўтганидан кейин қўлга киритилган биринчи соврин бўлди. 2025 йил ноябрь ойида клубни таниқли тадбиркор Тимур Турловга тегишли Freedom Holding Corp. таркибига кирувчи компания сотиб олганди.
