Фото: knews.kg сайтидан
Бишкек шаҳрининг Октябрь туман суди маҳаллий фуқаро Бақтибек Молдалиевни материаллари Қирғизистонда «экстремистик» деб тан олинган «Клооп» нашрининг постини репост қилгани учун уч йил муддатга колонияга ҳукм қилди. Бу ҳақда маҳкумнинг рафиқаси Элвира Жусуповага таяниб «Азаттиқ Азия» хабар берди.
Аниқлик киритилишича, Facebook ижтимоий тармоғининг фаол фойдаланувчиси бўлган Молдалиев жорий йилнинг май ойида ҳибсга олиниб, Бишкек тергов изоляторига жойлаштирилган. Қирғизистонликка нисбатан республика Жиноят кодексининг 278-моддаси 3-қисми («Оммавий тартибсизликларга чақириқлар») бўйича иш қўзғатилган.
Кейинчалик ўтказилган экспертиза иш фигурантининг чиқишларида тартибсизликларга чақириқларни аниқламаган. Шу сабабли деярли икки ой ўтгач, тергов айбловни Жиноят кодексининг 332-моддаси 1-қисмига («Экстремистик материалларни тайёрлаш, тарқатиш») қайта малакалаган.
Ҳуқуқ ҳимоячиси Рита Қорасартованинг маълумотига кўра, Қирғизистон пойтахти фуқаросининг жиноий таъқиб қилинишига унинг «Клооп», «Айт Айт Десе» ва Temirov Live нашрлари сайтларини ўқигани, ижтимоий тармоқларда ҳукуматни очиқ танқид қилгани, шунингдек, ўз саҳифалари орқали таъқибдаги ОАВ материалларини бошқалар билан бўлишгани сабаб бўлган. Хусусан, гап «Клооп» ҳақида кетмоқда. Бироқ Молдалиев айнан қайси материални репост қилгани ва шу туфайли қамоқ жазосини олганига аниқлик киритилмаган.
Маҳкумнинг ўзи айбини тан олмаган. Бундан ташқари, унинг октябрь ойида СИЗОда бўлганида яқинларига хат чиқаргани маълум. Унда у коррупцияни танқид қилгани учун таъқибга учрашини адолатсизлик деб атаган ҳамда Қирғизистон Жиноят кодексини инсон ҳуқуқлари соҳасидаги халқаро стандартларга мослаштиришга чақирган.
Ўтган йилнинг октябрь ойида Бишкек суди «Клооп», «Айт Айт Десе» ва Temirov Live нашрларининг чиқишларини ҳамда мазкур медиалойиҳалар асосчиларининг фаолиятини «экстремистик» деб топган эди.
