Тошкент ва Анқара муносабатлари кенг қамровли стратегик шериклик даражасига кўтарилади

Ўзбекистон президенти матбуот хизмати фотосурати

Тошкент ва Анқара муносабатларни ҳар томонлама стратегик шериклик даражасига кўтаришга қарор қилди. Бу ҳақда Олий даражадаги Ўзбекистон-Туркия стратегик ҳамкорлик кенгашининг иккинчи йиғилиши якунлари бўйича Ўзбекистон Президенти матбуот хизмати хабар берди.

Кенгаш йиғилиши Туркия президенти Режеп Таййип Эрдоғаннинг 29 март куни бошланган Ўзбекистонга расмий ташрифи доирасида бўлиб ўтди. Олий мартабали меҳмон кечки пайт келганига қарамай, президентлар тор доирада музокаралар ўтказишга, Стратегик ҳамкорлик кенгаши мажлисида иштирок этишга, шунингдек Тошкент вилоятида иссиқлик электр станциясини ишга туширишга, Сирдарё вилоятида ИЭС қурилишини бошлаб беришга муваффақ бўлдилар.

«Музокаралар чоғида сиёсий, парламентлараро, савдо-иқтисодий, сармоявий, транспорт, тўқимачилик, энергетика, қишлоқ хўжалиги, соғлиқни сақлаш, маданий-гуманитар соҳаларга оид масалалар батафсил муҳокама қилингани айтилди. Эришилган барча келишувларни тўлиқ амалга ошириш учун қўшма “йўл харитаси” ишлаб чиқилади», — дейилади Ўзбекистон президенти матбуот хизмати хабарида.

«Мамлакатларимиз ўртасидаги алоқаларнинг ҳозирги юқори даражасидан келиб чиқиб, муносабатларимизни кенг қамровли стратегик шериклик мақомига кўтаришга келишиб олдик», – деди Шавкат Мирзиёев.

Эрдоған Стратегик ҳамкорлик кенгаши йиғилиши натижаларини юқори баҳолади ва бундай йиғилишларни икки йилда бир марта эмас, ҳар йили давом эттиришни таклиф қилди.

«Ўзаро товар айирбошлаш ҳажми 3,6 миллиард доллардан ошиб, ўтган йили қарийб 72 фоизга ўсди. Биз уни имкон қадар тезроқ 5 миллиард долларга етказишни мақсад қилганмиз, кейин бу миқдорни 10 миллиард долларга кўтарамиз», — дея Туркия президентининг сўзларидан иқтибос келтирган Туркия президенти матбуот хизмати.

Бу жараён бир қатор муҳим келишувларни имзолашни тезлаштиради, дея қўшимча қилди Эрдоған.

Ташриф доирасида Тошкент вилояти Қибрай туманида иссиқлик электр станциясини ишга тушириш ва Сирдарё вилояти Ховос туманида ҳам ана шундай станция қурилишига бағишланган тантанали маросим бўлиб ўтди. Ҳар икки лойиҳа Туркиянинг «Cengiz Enerji» компанияси томонидан амалга оширилмоқда.

Тошкент вилоятида қурилган иссиқлик электр станциясининг қуввати 240 МВт бўлиб, йилига 2 миллиард кВт/соат энергия ишлаб чиқаради. Сирдарёдаги иссиқлик электр станциясининг қуввати эса 220 МВт бўлиб, йилига 1,7 миллиард кВт/соат электр энергияси ишлаб чиқаради.

Шавкат Мирзиёев таъкидлаганидек, биргина ўтган йилнинг ўзида турк компаниялари Ўзбекистонда энергетика соҳасида бешта йирик лойиҳани амалга оширди. Ушбу станцияларнинг умумий қуввати юқорида қайд этилган иссиқлик электр станцияларини ҳисобга олган ҳолда 1,4 минг мегаваттга етади.