Отабек Шукуров. anhor.uz сайти фотосурати
Ўзбекистон миллий терма жамоаси футболчилари Азиз Турғунбоев ва Отабек Шукуров мос равишда Туркиянинг «Сивасспор» ва «Кайсериспор» клублари билан шартнома имзоладилар.
Ўзбекистонлик футболчилар эркин агент сифатида жамоалар сафига қўшилишади. Турғунбоевнинг шартномаси 2025 йилнинг ёзига қадар мўлжалланган. Шукуровнинг шартномаси ҳақида ҳозирча маълумот йўқ.
Ўзбекистонлик футболчилар ўз жамоаларида хорижлик ўйинчилар ҳисобланмайди, чунки улар янги клублар рўйхатида туркий давлатлардан келган ягона хорижликлар ҳисобланади.
Эслатиб ўтамиз, Туркия Суперлигаси клубларида яна бир ўзбекистонлик футболчи Хусниддин Алиқулов («Ризеспор»), шунингдек, қозоғистонлик Бахтиёр Зайнутдинов («Бешиктош») ва Абат Аимбетов («Адана Демирспор») тўп сурмоқда. Қолаверса, Қирғизистон терма жамоаси дарвозабони Эржан Токотаев иккинчи кучли дивизионда бўлган «Шанлиурфаспор» клубида ўйнайди.
Азиз Турғунбоев 29 ёшли ярим ҳимоячи. Наманганнинг «Навбаҳор» клуби тарбияланувчиси. У 2021 йилгача ўз жамоасида тўп сурган, кейин Тошкентнинг «Пахтакор» клубига кўчиб ўтган ва у билан икки марта чемпион, уч марта Ўзбекистон кубоги соҳиби бўлган. Футболчининг Тошкент клуби билан шартномаси 2023 йилги мавсум якунига кўра тугаган. У Ўзбекистон миллий терма жамоаси сафида 30 та ўйин ўтказиб, 4 та гол урган.
Отабек Шукуров профессионал фаолиятини Муборакнинг «Машъал» жамоасида бошлаган. 2015-2017 йиллари Тошкентнинг «Бунёдкор» клубида ўйнаган. 2018 йил бошида у «Шаржа» (БАА) клубида, 2022 йили эса Туркиянинг «Фотиҳ Каргумрук» клубида ўйнаган. Футболчи 2023 йил охирида жамоани тарк этган. 27 ёшли ярим ҳимоячи Ўзбекистон миллий терма жамоаси сафида 65 та ўйин ўтказиб, 8 та гол урган.
