"Сараево" - "Актобе" ўйинидан лавҳа. "Сараево"ФК матбуот хизмати фотосурати
Қозоғистоннинг «Актобе» ва «Тобол» футбол клублари мос равишда Европа лигаси ва Конференция лигаси биринчи саралаш босқичи жавоб учрашувларини ўтказди. Ҳар икки жамоа ҳам ёмон ўйин кўрсатди ва турнирни тарк этди.
«Актобе» ўз майдонидаги илк учрашувда кутилмаганда Босниянинг «Сараево» жамоасига 0:1 ҳисобида имкониятни бой берди. Бироқ, экспертларнинг фикрига кўра, вазият умидсиз эмасди, чунки қозоқлар ўзларини осонгина тиклаб олишлари мумкин эди. Аввалига шундай ҳам бўлди. 41-дақиқада Идрис Умаев меҳмонларни ҳисобда олдинга олиб чиқди. Иккинчи бўлим бошида сараеволиклар ҳисобни тенглаштирган бўлса, 75-дақиқада Одилхон Танжариков ўйинни қўшимча бўлимга ўтказди. 93-дақиқада Жайро Жан ҳисобни 3:1, «Актобе» фойдасига ҳал қилган бўлса, орадан уч дақиқа ўтиб боснияликлар ҳисобдаги фарқни қисқартиришди. Икки бўлим якунида ҳисоб 3:3 бўлди. Пеналтилар сериясида «Сараево» ўйинчилари аниқроқ ҳаракат қилишди.
Шу тариқа, «Актобе» 2024/2025 йилги мавсум учун еврокубоклардаги иштирокини якунлаган биринчи қозоқ клуби бўлди.
Қўстанайнинг «Тобол» клуби илк учрашувда Словакиянинг «Ружомберок» клубига 2:5 ҳисобида имкониятни бой бергани боис Қозоғистон кубоги соҳибларига Европа лигасининг кейинги саралаш босқичига чиқиш учун йирик ғалаба керак эди. «Тобол» учрашувни жўшқин бошлади — 8-дақиқадаёқ Аҳмад Эл Мессауди жамоасини олдинга олиб чиқди. Мезбонлар сенсация яратишга қодирдек туюлди, аммо словакиялик футболчилар рақибларига бошқа гол уришга имкон беришмади. Якуний ҳисоб 1:0.
«Тобол» иккинчи саралаш босқичида Швейцариянинг «Сент-Галлен» клуби билан ўйнайдиган Конференция лигасига йўл олади.
Конференция лигасининг иккинчи саралаш босқичида «Ордабаси» «Тобол»дан ташқари Люксембургнинг «Дифферданж» клубига, «Астана» эса Молдавиянинг «Милсами» жамоасига қарши баҳс олиб боради. Учрашувлар 25 июль ва 1 август кунлари бўлиб ўтади.
