Қирғизистон Олий суди биноси. kyrtag.kg сайти фотосурати
Қирғизистон Олий суди (ОС) раиси Замирбек Базарбеков ҳуқуқ-тартибот идоралари ходимларига айбсизлик презумпцияси тамойилига риоя қилишни сўраб мурожаат қилди. Расмийга кўра, баъзида тергов бу меъёрни бузади, шов-шувли жиноятлар ва ҳибсга олишлар ҳақида хабар беришга шошилади. Бу ҳақда Республика Олий суди расмий сайтида эълон қилинган хабарда сўз юритилади.
Базарбеков ҳар қандай ҳолатда ҳам айбсизлик презумпцияси тамойилига риоя қилиш зарурлигини таъкидлайди. Аксинча, тергов ходимлари ҳибсга олинганлар ва фош қилинганлар ҳақида оммавий ахборот воситаларига хабар беришга шошилмоқда, гўёки жиноят исботланган, қўлга олинганлар жиноятчидек маълумотларни тақдим этишмоқда.
«Айбсизлик тамойилини бир четга суриб қўювчи бундай тажовузкор ахборот сиёсати аҳолининг ҳокимият суд тармоғига бўлган ишончига путур етказади», — дейди Олий суд раҳбари.
Мисол сифатида у тергов органларининг судялар билан боғлиқ маълумотларини келтирган. Кейинчалик маълум бўлишича, хавфсизлик кучлари иш бўйича материалларни муддатидан олдин эълон қилган ва шов-шувли пресс-релиздан кўп ўтмай, жиноий таъқибни тугатиш тўғрисида қарор қабул қилинган. Бироқ, Базарбеков ўз мисолида айнан қайси эпизодни назарда тутганига аниқлик киритмаган.
Олий суд раиси айбсизлик презумпцияси тамойили давлатнинг бош тамойилларидан бири эканини эслатади. Бу мамлакат Конституциясининг 57-моддаси 1-қисмида мустаҳкамлаб қўйилган бўлиб, ҳар ким унинг айби қонунда белгиланган тартибда исботланмагунча ва суднинг қонуний кучга кирган ҳукми билан белгиланмагунча жиноят содир этганликда айбсиз ҳисобланади.
«Ушбу тамойил Қирғизистон Республикаси ҳуқуқ тизимининг ажралмас қисмидир», — дея хулоса қилади Базарбеков.
