life.ru сайти фотосурати
Европа Иттифоқи Ўзбекистоннинг Trade Engine System компаниясини Россияга қарши санкцияларнинг 17-пакетига киритди. Санкциялар рўйхати ЕИ расмий сайтида эълон қилинган.
Trade Engine System компанияси электрон ва телекоммуникация ускуналари ва эҳтиёт қисмлари улгуржи савдоси билан шуғулланади. У 2022 йили рўйхатга олинган. Компания раҳбари ва таъсисчиси сифатида Носиржон Акбаров кўрсатилган.
Бу Украинада МҲО бошланганидан сўнг Россияга босим доирасида Европа Иттифоқи санкциялари остида қолган Ўзбекистондан бешинчи компания ҳисобланади. Alfa Beta Creative LLC, GFK Logistics Asia LLC, Mvizion LLC компаниялари 2023 йили, UZSTANEX LLC эса 2025 йил февралида рўйхатга киритилган. Рўйхатдан Қозоғистоннинг тўртта ва Қирғизистоннинг иккита компанияси жой олган.
Ҳаммаси бўлиб 17-санкция пакетига Россия, Ўзбекистон, Беларус, Хитой, Туркия, БАА, Сербия ва Вьетнамдан 75 нафар жисмоний ва юридик шахслар киритилган.
Бундан олдин бир қатор Ўзбекистон компаниялари ва тадбиркорлари АҚШ Молия вазирлиги санкциялар рўйхатига киритилганди. Жумладан, Алишер Усмонов USM компанияси вакиллари ва «Оҳангаронцемент» корхонаси.
Украина ҳам санкциялар рўйхатига Ўзбекистон компанияларини қўшган. Булар «Оҳангаранцемент» дан ташқари қурилиш техникасини ижарага берувчи Mercury Renaissance, ёғоч ва целлюлоза ишлаб чиқарувчи Raw Materials Cellulose ҳамда Mercury Renaissance МЧЖда рўйхатдан ўтган Farg'ona Kimyo Zavodi. Бундан ташқари, Украина президенти икки фуқароликка эга, Mercury Renaissance асосчиларидан бири Рустам Мўминовга нисбатан персонал санкциялар қўллаган.
