interfax.ru сайти фотосурати
Ўзбекистоннинг Россиядаги элчихонаси Россия ТИВга нота йўллаб, унда Москва ОМОНи (Росгвардиянинг махсус бўлинмаси) ходимларининг мигрантлар ётоқхонасига уюштирган қўпол рейдига изоҳ бериш ва куч ишлатар тизим ходимларининг ҳаракатларига ҳуқуқий баҳо беришни сўради. Бу ҳақда Ўзбекистон дипломатик маҳкамаси матбуот котиби Аҳрор Бурхонов ўзининг Telegram-каналида хабар берди.
Расмийнинг сўзларига кўра, Ўзбекистон Ташқи ишлар вазирлиги ходимларининг россиялик ҳамкасблари билан 10 июнь куни бўлиб ўтган ойлик йиғилишида Москвадаги ҳодиса муҳокама қилинган. Вазирлик вакиллари РФ ҳудудида рухсатсиз тинтувлар ва республика фуқароларига нисбатан қўпол муносабатда бўлиш ҳолатларидан хавотир билдирган.
«Бундай ҳолатлар мамлакатларимиз ўртасидаги дўстона муносабатларга асло тўғри келмаслиги, уларни олдини олиш учун аниқ чора-тадбирлар зарурлигига эътибор қаратдик», — дейилади ТИВ матбуот хизмати хабарида.
Бурхонов Ўзбекистон хорижда яшаётган ва вақтинча бўлиб турган ватандошлар ҳуқуқ ва манфаатларини ҳимоя қилишни ўзининг устувор вазифаси деб билишини таъкидлади. Шу муносабат билан, Россия Федерациясининг тегишли идораларини Ўзбекистон фуқароларига нисбатан ҳурмат билан муносабатда бўлиш, уларнинг шаъни ва қадр-қимматини камситмасликка чақирилади.
Марказий Осиё республикаси Ташқи ишлар вазирлиги бу масалани кузатиб бораётганини ва зарурат туғилганда чоралар кўришда давом этишини таъкидлайди. Расмийларнинг қўшимча қилишича, Ўзбекистоннинг Москвадаги элчихонаси ҳам дипломатик каналлар орқали Россия томони билан долзарб масалалар юзасидан мулоқот олиб бормоқда.
ℹ️ 8 июнь куни хавфсизлик кучлари Москвадаги мигрантлар ётоқхонасида қўпол рейд ўтказган. Аниқланишича, натижада миграция режимини бузган 5-6 нафар шахс қўлга олинган. Улар орасида Тожикистоннинг икки фуқароси бўлган, кейинчалик улар мамлакатдан чиқариб юборилган.
Кейинроқ Ўзбекистон Ҳукумати ҳузуридаги Миграция агентлиги ушбу ҳодиса юзасидан хавотир билдириб, ҳуқуқлари бузилиши ёки бошқа шунга ўхшаш муаммоларга дуч келган ватандошларни Ўзбекистон агентлигининг РФдаги ваколатхонасига зудлик билан мурожаат қилишга чақирди.
Бу вазиятга Ўзбекистон жамоат арбоблари ҳам муносабат билдиришди. Жумладан, Журналистика ва оммавий коммуникациялар университети ректори Шерходхон Қудратхўжа Москва ОМОНи ҳаракатларини «оддий нацизм» деб атади, республика фуқароларини Россияга ишлашга бормасликка, бунинг учун бошқа давлатларни танлашга чақирди.
