ura.news сайти фотосурати
Тошкент вилояти Ангрен шаҳри жиноят ишлари бўйича суди Россиянинг «Вагнер» хусусий ҳарбий компанияси сафида Украинада жанг қилган Ўзбекистон фуқаросига беш йилга озодликни чеклаш жазосини берди. У республика Жиноят кодексининг ёлланиш моддаси бўйича айбдор деб топилди, деб ёзади «Газета.uz» суд материалларига таяниб.
Ушбу маълумотларга кўра, 2000 йили туғилган У.М. 2021 йил ёзида даромад топиш мақсадида Россияга кетган. Судланувчининг сўзларига кўра, ўша пайтда Ангрен бандликка кўмаклашиш маркази унга Москва вилоятидаги почта алоқаси омборидан бўш иш ўрнини таклиф қилган. Йигит рози бўлган ва бошқа 15-20 нафар мигрант билан бирга Россия Федерациясига учиб кетган.
Патент олган хорижлик ҳақиқатан ҳам омборга ишга киради, лекин у ерда атиги уч кун ишлайди. Шундан сўнг, унга бўш иш ўрни йўқлиги сабаб Самара вилоятида ишга жойлашиш таклифи берилади. Бу ерда ўзбекистонликни тожикистонлик Фарид исмли фуқароси кутиб олади ва У.М. юкни маълум бир адресатга етказиб беришини сўрайди. Аммо йўлда курьер полиция томонидан ушланган, посилка ичидан героин топилган. Тезкор ходимлар мижозни тополмагани учун етказиб берувчига нисбатан наркотик моддалар савдоси бўйича жиноят иши қўзғатилган.
Бундан ташқари, судланувчининг сўзларига кўра, терговчи уни 500 минг рубль (6 минг доллардан ортиқ) эвазига ватанига депортация қилишни таклиф қилган. Аммо йигитнинг бундай суммаси бўлмаган ва у тез орада айбдор деб топилиб, 8,5 йилга озодликдан маҳрум этилган.
2022 йил сентябрь ойида Вагнер ХҲК асосчиси Евгений Пригожин жазони ўтаётган колонияга келган. Тадбиркор терроризм ва зўрлашда айбланганлардан ташқари маҳбусларни йиғиб, уларга Украина ҳудудидаги жанговар ҳаракатларда қатнашишни таклиф қилган. Бунинг эвазига маҳбусларга 150 минг рубль (тахминан 2 минг доллар), Россия фуқаролиги ва олти ойлик хизматдан сўнг авф этилиши ваъда қилинган. 100 дан ортиқ киши «Вагнет»га қўшилишга рози бўлган. У.М. панжара ортида қолган.
Кейинчалик «Вагнер» вакиллари яна колонияга келишган. Ўзбекистонликнинг сўзларига кўра, бу сафар улар руслар ва Марказий Осиёдан келган маҳбусларни алоҳида-алоҳида сафга тортганлар. Биринчи сафга компанияга ихтиёрий равишда қўшилиш таклиф қилинган бўлса, иккинчи сафга улар дастлаб худди шундай таклифни билдиришган. Аммо 10-15 киши рад жавобини берганидан кейин улардан учтаси дарҳол отиб ташланган. Шундан сўнг барча муҳожирлар «Вагнер» сафида хизмат қилишга рози бўлишган.
У.М. ва бошқаларни Ростов-Донга олиб кетишади, у ерда улар ХҲК билан шартнома имзолайдилар, кейин улар Донецк яқинидаги ўқув лагерига жўнатилади. Судланувчи 2023 йил февраль ойи бошида оёғидан яраланганига қадар тўрт ой давомида жангларда қатнашганини тан олган. Унинг қўшимча қилишича, маҳбусларнинг бошқа иложи бўлмаган, чунки улар жанг майдонидан чекинишса, отиб ташлаш билан таҳдид қилишган.
Ўзбекистонлик госпиталда бир ойга яқин даволанади, сўнг фронтга қайтарилади. Хизмат муддати тугашига бироз вақт қолганида, ярасининг аҳволи ёмонлашади ва йигит яна касалхонага ётқизилади, кейин Ростовга юборилди. Бу ерда, 2023 йил апрель ойида «вагнерчи»га 500 минг рубль тўлашган, шунингдек у «Жасорат учун», «Ярадорлик учун» ва «Соледарни қўлга киритгани учун» медаллари, шунингдек, Россия фуқаролигини олиш сертификати билан тақдирланган.
Ўша йил сентябрь ойида чет эл фуқароси Россия паспортини олиб, қандолатчилик цехига ишга жойлашган. Аммо, жангчилар тез-тез жанг зонасига қайтарилаётганини билиб, У.М. Ватанга қайтишга қарор қилади. 2024 йил кузида у Ангренга қайтиб келади ва кейинчалик ёлланиш моддаси бўйича айбланувчига айланади.
Суд жараёнида айбланувчи тавба қилган ва енгиллаштирувчи ҳолатларни ҳисобга олишларини сўраган: у оилада ягона боқувчи, отаси эса биринчи гуруҳ ногирони. Натижада, собиқ «Вагнер» жангчисига қамоққа олишни назарда тутмаган жазо берилган.
