eurasia-assembly.org сайти фотосурати
Ўзбекистон ва Россия яқин йилларда ўзаро товар айирбошлаш ҳажмини 30 миллиард долларга етказиш ниятида. Бу кўрсаткичга 2030 йилгача қўшма лойиҳаларни фаоллаштириш ва бизнес учун қулай шарт-шароитлар яратиш орқали эришиш лозим, дея Россия Иқтисодий ривожланиш вазири Максим Решетников сўзларини келтиради унинг матбуот хизмати.
12 июнь куни якунланган IV Тошкент халқаро инвестиция форуми доирасида икки мамлакат ҳукуматлари вакиллари ўртасида ушбу масалалар муҳокама қилинди.
Жумладан, Решетников таъкидлашича, иқтисодий блок олдига яқин беш йил ичида Россиянинг Ўзбекистонга экспортини 2,7 баробарга, яъни 17,9 миллиард долларгача ошириш вазифаси турибди. Шу билан бирга, Марказий Осиё республикасидан РФга товар ва хизматлар етказиб бериш ҳажмини 3,6 баробарга, яъни 11,8 миллиард долларга етказиш ҳам зарур.
Россия Иқтисодий ривожланиш вазирлиги раҳбарининг қўшимча қилишича, сўнгги беш йил ичида мамлакатлар ўртасидаги товар айирбошлаш ҳажми 1,7 баробар ошиб, 10 миллиард долларга етган. Эндиликда ўзаро товар айирбошлаш ҳажмини уч баробарга ошириш вазифаси қўйилди.
Россия мулозимининг айтишича, бугунги кунда Ўзбекистонда Россия Федерациясининг 3 мингдан ортиқ компанияси фаолият юритмоқда, янги қўшма лойиҳаларни қўллаб-қувватлаш учун Инвестиция платформаси яратилган. Вазир фармацевтика, энергетика, транспорт ва логистика каби соҳаларда ташаббусларни амалга ошириш учун улкан салоҳият мавжудлигига ишонч билдирди.
Мисол тариқасида Решетников республикага метро вагонлари ва юк локомотивлари, коммунал ва махсус техникалар етказиб берилишини келтирди. Энергетика ва саноат тармоқларида Ўзбекистон иссиқлик электр станциялари, гидроэлектр станциялари, Олмалиқ кон-металлургия комбинатини модернизация қилиш лойиҳалари амалга оширилмоқда. Ҳамкор давлатда дори воситалари ва тиббий асбоб-ускуналарни ишлаб чиқариш борасида айни пайтда Россия Федерациясида маҳаллийлаштириладиган дори воситалари ва маҳсулотлар рўйхати тайёрланмоқда, уларни кафолатли харид қилиш 2025-2034 йилларга мўлжалланган.
Вазирнинг қўшимча қилишича, ҳозирда Ўзбекистонда Россия иштирокида очилган «Чирчиқ» ва «Жиззах» технопарклари фаолият юритмоқда. Жорий йилнинг иккинчи ярмида Бухоро ва Навоий шаҳарларида инновацион майдонлар пайдо бўлиши ҳисобига бундай объектлар сони икки баравар кўпаяди. Бу икки давлат инвесторлари учун имкониятларни кенгайтиради, деди Решетников.
Шунингдек, у транспорт йўлакларини, хусусан, ўтган йили 20 миллион тоннадан ортиқ юк ташилган «Шимол-Жануб» йўналишини ривожлантириш муҳимлиги ҳақида гапирди. Бундан ташқари, Марказий Осиё республикаси 2030 йилгача мўлжалланган тегишли Концепцияда қайд этилган ушбу йўналиш бўйлаб етказиб беришни кенгайтиришдан жуда манфаатдор.
Савдо соҳасида Ўзбекистонда Бутунроссия ташқи савдо академиясининг филиалини очиш ва «Ишлаб чиқариш кооперацияси ва сотиш» хизматини Online-Bozor.uz тизими билан интеграциялаш масаласи муҳокама қилинмоқда.
Ниҳоят, мамлакатлар туризм соҳасидаги ҳамкорликни мустаҳкамлаш ниятида.
«Ўтган ҳафта 51 кун давом этадиган ва беш мамлакат, жумладан, Ўзбекистоннинг 30 та шаҳрини қамраб олувчи «Евроосиё қалбига саёҳат» экспедицияси бошланди. 10-19 июль кунлари Намаган, Тошкент, Самарқанд, Бухоро шаҳарларига ташриф буюрилади. Буларнинг барчаси халқлар маданияти, тарихи билан яқиндан танишишга ёрдам беради», — дея хулоса қилди Решетников.
