Пауло Бенту. gsp.ro сайти фотосурати
Португалиялик мутахассис Пауло Бенту футбол бўйича Ўзбекистон миллий терма жамоаси бош мураббийи лавозимига кўриб чиқилмоқда. Бу ҳақда журналист Жалолиддин Қобилжонов ўзининг Телеграм-каналида маълум қилди.
Журналистнинг ёзишича, португалияликнинг вакиллари 27 август куни музокаралар учун Тошкентга келади.
Ўзбекистон миллий терма жамоасининг ҳозирги мураббийи маҳаллий мутахассис Тимур Кападзе бўлиб, унинг қўл остида жамоа жаҳон чемпионати йўлланмасини қўлга киритди. Мураббий айни дамда жамоани CAFA Кубоги мусобақасига тайёрламоқда.
«Фарғона» хабарига кўра, янги чет эл мураббийи учун бюджет маблағлари аллақачон ажратилган. Назарий жиҳатдан, футбол ассосиасияси раҳбарияти пулдан воз кечиши ва Тимур Кападзени ўзида сақлаб қолиши, маблағни бошқа лойиҳаларни амалга оширишга йўналтириши мумкин. Бироқ, кўринишидан, бу вариант энди кўриб чиқилмайди.
Қолаверса, миш-мишларга кўра, Кападзенинг истеъфосига жаҳон чемпионатига машҳур хорижлик бошқарувида боришни хоҳловчи бир неча терма жамоа футболчилари қўллаб-қувватламоқда, бу эса футболчиларнинг фикрича, уларнинг фаолиятига туртки бериши керак.
Эслатиб ўтамиз, бундан олдин Ўзбекистон миллий терма жамоаси бош мураббийлигига германиялик Йоахим Лёв, турк Фотиҳ Терим ва хорватиялик Славен Биличнинг номзодлари кўриб чиқилганди.
ℹ️ Пауло Бенту — Португалиялик собиқ ярим ҳимоячи ва мураббий. У футболчи сифатида «Эстрела Амадора», «Витория Гимарайнш», «Бенфика», шунингдек, Испаниянинг «Овьедо» ва Лиссабоннинг «Спортинг» клубларида ўйнаган ва шу ерда футболчилик фаолиятини якунлаган. У Португалия терма жамоасида 30 дан ортиқ ўйин ўтказган, Евро-2000 ва ЖЧ-2002да иштирок этган.
У мураббийлик фаолиятини «Спортинг» академиясида бошлаган, тез орада асосий жамоани бошқарган ва Португалия кубоги ва Суперкубогини қўлга киритган. 2010 йилдан 2014 йилгача у Португалия терма жамоаси бош мураббийи бўлиб, у билан Евро-2012 ярим финалига қадар етиб борган. Кейинроқ Бразилия («Крузейро»), Греция («Олимпиакос»), Хитой (Чонцин Дандэй») ва Жанубий Кореяда ишлаган — ушбу мамлакат терма жамоаси билан жаҳон чемпионатининг плей-офф босқичига йўл олган. Бентонинг сўнгги иш жойи БАА терма жамоаси бўлиб, у билан 2026 йилги жаҳон чемпионатига тўғридан-тўғри йўлланмани қўлга кирита олмаган, Эрон ва Ўзбекистон терма жамоаларига имкониятни бой берганди. У жорий йил март ойида бўлиб ўтган саралаш турнири якунланмай туриб, ишдан бўшатилганди.
