Абдуқодир Ҳусанов. Ижтимоий тармоқдаги фотосурат
Ўзбекистон терма жамоаси ва Англиянинг «Манчестер Сити» клуби ҳимоячиси Абдуқодир Ҳусанов Франциянинг «Ланс» клубига ўтишидан олдин фаолиятини Россияда давом эттириши мумкин эди. Бу ҳақда унинг агенти Ғайрат Ҳасбиуллин «Спорт-Экспресс»га берган интервьюсида маълум қилди.
«Биз Қодир билан Тошкент — Истанбул йўналиши бўйича эконом классда учаётган эдик, кейинчалик у “Ланс”да ўйнаши учун Францияга йўл олишимиз лозим эди. Мен ундан: “Ўзингни топ-5 лигада ўйлаш учун кетаётгандек ҳис қиляпсанми?” деб сўрадим. У эса: “Ростини айтсам, мени Россияга сотишади деб ўйлагандим”, — дея унинг сўзларини келтирди Ҳасбиуллин.
Агентнинг сўзларига кўра, Россия клублари Ҳусановга нисбатан жиддий қизиқиш билдирган ва унга молиявий жиҳатдан манфаатлироқ шартларни таклиф қилишган. Жумладан, ҳимоячини «Сочи» клуби ўз сафига таклиф қилган.
«Унинг атрофида одамлар гирдикапалак эди, улар: “Икки йил “Сочи”да ўйнайсан, кейин хоҳлаган жойингга кетаверасан”, деб ишонтиришарди. Аммо бундай ҳолатлар одатда нима билан тугашини ўзингиз ҳам яхши тушунасиз», — дейди Ҳасбиуллин.
Футболчига Владикавказнинг «Алания» клуби ҳам қизиқиш билдирган. Бироқ ,Ҳусанов фаолиятининг илк кунлариданоқ Европада ўйлашни мақсад қилган ва Россия чемпионатини устувор йўналиш сифатида кўриб чиқмаган.
«У 17 ёшида Беларусга кетди, ҳатто “Бунёдкор”нинг дубль жамоасида ҳали ўйнамаган ҳам эди. У бошиданоқ Европани орзу қилганди. Ўйлайманки, ўша пайтда уни Россия клубларидан бири истаган тақдирда ҳам, Қодир рад жавобини берган бўларди», — деди агент.
Ҳасбиуллин, олдига катта мақсадлар қўяётган ўзбекистонлик ёш футболчилар ҳозирда Европага кетишга ҳаракат қилашаётганини қўшимча қилади. Унинг фикрича, Россия чемпионатининг жозибадорлиги пасайишига, жумладан, Россия футболи халқаро миқёсда яккаланиб қолгани ҳам сабаб бўлган.
ℹ️ Абдуқодир Ҳусанов — Тошкентнинг «Бунёдкор» клуби тарбияланувчиси. 2022 йилда у Беларуснинг «Энергетик-БГУ» жамоасига ўтган. Ўзбекистон ёшлар терма жамоасининг Осиё кубоги ва жаҳон чемпионатидаги муваффақиятли иштирокидан сўнг Ҳусановга Франциянинг «Ланс» клуби қизиқиш билдиради. 2023 йилда у Лига 1 чемпионатига йўл олган. 2024 йил кузидан бошлаб у клубнинг асосий ҳимоячисига айланган. 2025 йил январь ойида Ҳусанов бонусларни ҳисобга олганда 50 миллион евро эвазига «Манчестер Сити»га ўтди. Бу трансфер Марказий Осиё футболи тарихидаги энг қиммат трансфер бўлди.
