Бирлашган Араб Амирликларининг Etihad Airways компанияси Ўзбекистон билан мунтазам авиақатновларни йўлга қўйди. Дунёдаги энг яхши авиакомпаниялар қаторига кирувчи ташувчининг биринчи рейси 10 август куни Тошкент аэропортида кутиб олинди, деб хабар беради Uzbekistan Airports компанияси ўзининг Telegram-каналида.
Абу-Даби — Тошкент йўналиши бўйича парвоз қилган Airbus A320 самолёти маҳаллий вақт билан соат 02:30 да Ўзбекистон пойтахтига қўнди. Анъанага кўра, самолёт сув аркаси билан кутиб олинган, лайнер йўловчиларига эса гуллар ва миллий ширинликлар тарқатилган.
Etihad Airways компаниясининг Марказий Осиё республикасига биринчи парвози муносабати билан мунтазам авиарейсларни ишга тушириш маросими бўлиб ўтди. Тадбирда авиакомпания, аэропорт ва БААнинг Тошкентдаги элчихонаси вакиллари иштирок этди.
Парвозлар ҳар куни амалга оширилади. Бу пойтахтлар ўртасида йўловчилар учун қулай авиақатновни таъминлайди.
Араб компаниясининг сайтида Тошкентдан Абу-Дабига эконом-класс тоифадаги авиачипталар бир томонга ўртача 300 евродан бироз қиммат туради.
«Etihad Airways — дунёдаги етакчи авиакомпаниялардан бири ҳисобланади. Тошкентда бундай ҳамкорнинг пайдо бўлиши йўловчилар учун янги имкониятлар очади ва Ўзбекистоннинг халқаро авиация харитасидаги мавқеини мустаҳкамлайди. Абу-Даби билан ҳар кунлик тўғридан-тўғри авиақатнов нафақат икки мамлакат ўртасидаги ишбилармонлик ва сайёҳлик алоқаларини ривожлантиришга, балки йўловчиларга минтақанинг энг йирик авиация хабларидан бири орқали кейинги саёҳатларини қулай ташкил этиш имконини ҳам беради», — дея таъкидлади Uzbekistan Airports матбуот хизмати.
ℹ️ Etihad Airways — Бирлашган Араб Амирликларининг миллий авиакомпанияси бўлиб, 2003 йилда ташкил этилган ва Абу-Даби халқаро аэропортида жойлашган. Компания кенг авиайўналишлар тармоғига эга. Etihad мунтазам равишда халқаро соҳа рейтингларида парвозлар хавфсизлиги, сервис сифати ва йўловчиларга хизмат кўрсатиш даражаси бўйича юқори баҳоларни олади. Бундан ташқари, авиакомпания доимий равишда дунёдаги энг яхши авиакомпаниялар қаторига киради ва мустақил Британия агентлиги Skytrax томонидан берилган 4 юлдузли сифат сертификатига эга.
