Қирғизистон президенти Садир Жапаров 2027 йилда давлат раҳбари лавозимига номзодини қўяди. Бу ҳақда у журналист Али Токтакуновга берган интервьюсида маълум қилди.
«Мен иккинчи муддатга сайланиш учун номзодимни қўйишимни аллақачон айтганман», — деди Жапаров.
Президентнинг иккинчи муддатга номзодини қўйиш нияти ҳақида унинг матбуот котиби Аскат Алагозов 2024 йил январь ойида хабар берган эди. Ўшанда сайловлар 2026 йилда ўтказилиши режалаштирилган, аммо кейинчалик улар 2027 йил январь ойига кўчирилди.
Айни пайтда Токтакуновга берган интервьюсида Жапаров Камчибек Ташиевни президентлик креслосига ўтқазиб, ўзи эса нафақага чиқишни режалаштирганини айтди.
«Суҳбат очиқ-ойдин кетаётган экан, сизга бутун ҳақиқатни айтаман. Менинг ўз режам бор эди: олти йил ишлаб, 2027 йилда сайловда номзодимни қўймаслик. Агар ўша вақтга келиб Камчи тайёр бўлса, яхши ишласа ва тажриба орттирган бўлса, уни сайловда иштирок этишини хоҳлаган эдим. Ўзим сайловда қатнашмасдим, Камчини президент қилардим ва дам олишга кетардим. Бу менинг шахсий режам эди», — дея Жапаровнинг сўзларини келтиради АКИpress.
Жапаровнинг сўзларига кўра, у ўз қарори ҳақида Ташиевга 2024 йилдаёқ айтган.
«Мен унга: “Тайёр бўл, атрофингдагиларни тозала ва тарбияла”, деган эдим. Аммо кейин унинг тайёр эмаслигини кўрдим. Барча ходимлар ундан қўрқа бошлади. Унинг бутун атрофидагилар ўзларини гўё осмонга кўтарилгандек тута бошлашди. “75 шахс мактуби” иши бўйича парламентда депутатларни иккига ажрата бошлашди: “Сен генерал томонидасан, сен эса унинг томонида эмассан”. Шунда мен уни чақириб: “Бундай бўлмайди. Халқни бўлиш мумкин эмас… Шунинг учун сени лавозимдан озод қиляпман. Хафа бўлма. Агар кейинги сайловда иштирок этмоқчи бўлсанг, сенинг иштирокинг учун шароит яратиб бераман», дегандим”, — деди Жапаров.
Бироқ, 2026 йил июль ойида Ташиев 2027 йилда президентликка номзодини қўйишдан бош тортиши ҳақида маълум қилди.
«У ўшандаёқ: “Мен иштирок этмайман. Сенга қарши сайловга бормайман. Агар мени шунчаки лавозимдан озод қилаётганингни айтганингда, шунинг ўзи етарли бўларди”, — деди. Кейин у омма олдида: “Мен уни қўллаб-қувватлайман, ўз жамоам билан уни қўллаб-қувватлаш тарафдори бўламан”, — дея баёнот берди. Мен буни кўрдим», — деди Жапаров.
Садир Жапаров Қирғизистон президенти лавозимини 2021 йил январь ойида эгаллаган ва сайловчиларнинг 79,2 фоиз овозини олган. Давлат раҳбари учун навбатдаги сайлов 2027 йил 27 январда бўлиб ўтади. Мамлакат Конституциясига кўра, президент беш йиллик муддатга икки марта сайланиши мумкин.
ℹ️ Камчибек Ташиев Садир Жапаровнинг яқин сафдоши бўлган, халқ орасида уларнинг тандеми «эки дос» деб аталган. 2026 йил 10 февраль куни Жапаров Ташиевни Бош вазир ўринбосари ва Миллий хавфсизлик давлат қўмитаси (МХДҚ) раиси лавозимларидан бўшатди. Бу қарордан бир кун олдин президент ва парламент спикерига муддатидан олдин президентлик сайловини ўтказишга чақириқ билан мурожаат эълон қилинган эди. Мурожаат остига 75 киши имзо қўйган. Жапаров Ташиевни истеъфога чиқаришини «жамиятда, жумладан давлат тузилмалари ўртасида бўлинишга йўл қўймаслик, аксинча, бирдамликни мустаҳкамлаш» истаги билан изоҳлаган. Кейинчалик Ташиевга нисбатан «75 шахс иши» бўйича жиноий иш қўзғатилиб, шу йил июль ойи бошида у Жиноят кодексининг 326-моддаси («Ҳокимиятни зўрлик билан эгаллаб олиш») бўйича айбдор деб топилиб, мол-мулки мусодара қилинган ҳолда тўрт йиллик қамоқ жазосига ҳукм қилинган эди.
