«Андижон» ФК фотосурати
Туркиянинг DİLAHAN TURİZM компанияси Анталияда «Андижон» футбол клуби учун учта ўқув-машғулот йиғинини ташкил этиш бўйича қарздорлик сабабли яқин кунларда клуб устидан судга даъво киритишни режалаштирмоқда. Тегишли хат нусхаси «Фарғона» таҳририятига келиб тушган.
Туркия томони асосий қарз миқдорини 69 922 евро деб баҳоламоқда. Бундан ташқари, компания тўловларни кечиктирганлик учун пеня ҳисоблаган бўлиб, 11 август ҳолатига унинг миқдори 12 642 еврони ташкил этган. Шу тариқа, ушбу санада талабларнинг умумий суммаси 82 564 еврога етган. Пеня ҳисобланиши давом этмоқда.
Низо 2026 йилги мавсум бошланишидан олдин компания томонидан Туркияда «Андижон» клуби учун ташкил этилган учта ўқув-машғулот йиғини билан боғлиқ.
Учта йиғин бўйича хизматларнинг умумий қиймати 280 141 еврони ташкил этган. «Фарғона» аввалроқ компания маълумотларига таяниб хабар берганидек, клуб 210 219 еврони тўлаган, қолган 69 922 евро эса ҳанузгача тўланмаган.
Шартномалар шартларига кўра, тўловни кечиктирганлик учун ҳар бир кечиктирилган кунга қарз суммасининг 0,1 фоизи миқдорида пеня белгиланган.
DİLAHAN TURİZM судгача бўлган талабномада асосий қарзни тўлаш ва 15–20 август кунлари оралиғида ҳисобланган пеняни қоплашни талаб қилган. Компания вакили «Фарғона»га маълум қилишича, қарз тўланмаган ва энди Туркия томони яқин кунларда судга даъво киритишни режалаштирмоқда.
Келтирилган суммалар ва ҳолатлар судгача бўлган талабнома DİLAHAN TURİZM компаниясининг позициясига асосланган. Қарздорликнинг мавжудлиги ва миқдори суд томонидан ҳозирча аниқланмаган. Компания, шунингдек, суд харажатлари ва юридик хизматлар учун сарфланган маблағларни қоплашни ҳам талаб қилмоқчи, талабномада ушбу харажатлар 2,8 минг евро деб баҳоланган.
«Андижон» футбол клуби қарздорлик юзасидан ҳозирча изоҳ бермади.
