«Пахтакор» футболчилари. «Пахтакор» ФК фотосурати
Ўзбекистоннинг «Нефтчи» ва «Пахтакор» клублари ОФК Элит Чемпионлар лигасининг 2026/27 йилги мавсуми умумий босқичидаги иштирокини муваффақиятли бошлади. Фарғона клуби ўз майдонида Ироқнинг «Ал-Кува Ал-Джавия» жамоасини 1:0 ҳисобида мағлуб этган бўлса, Тошкент жамоаси сафарда Саудия Арабистонининг «Ал-Аҳли» клуби билан 1:1 ҳисобида дуранг ўйнади.
«Нефтчи» Фарғонада Ироқ клубини қабул қилди ва учрашувнинг аксарият қисмида рақибидан фаолроқ ҳаракат қилди. Мезбонлар бир нечта хавфли вазиятлар яратди, бироқ узоқ вақт давомида ўз устунлигини голга айлантира олмади.
Ғалаба голи 83-дақиқада урилди. Кот-д’Ивуарлик ҳимоячи Коффи Куао ўнг қанотдан узатма амалга оширди, сербиялик ҳужумчи Зоран Марушич эса боши билан зарба бериб, тўпни дарвоза тўрига жойлади. Ушбу гол Исламбек Исмоилов шогирдларига турнирдаги дастлабки уч очкони тақдим этди.
«Пахтакор»ни эса анча мураккаб старт кутган эди. Тошкент клуби Жидда шаҳрида ОФК Элит Чемпионлар лигасининг амалдаги ғолиби «Ал-Аҳли»га қарши майдонга тушди.
Саудия жамоаси ташаббусни ўз қўлида ушлаб турди ва кўплаб вазиятлар яратди. Бироқ «Пахтакор» дарвозабони Владимир Назаров бир неча бор жамоасини голдан қутқарди. 85-дақиқада Фламарион Ўзбекистон клубини олдинга олиб чиқди ва «Пахтакор» сенсацион ғалабага яқин келди.
«Ал-Аҳли»ни мағлубиятдан фақат қўшимча вақтдаги гол қутқарди. 93-дақиқада Фирас Ал-Бурайкан ҳисобни тенглаштирди — 1:1.
Шу тариқа, Ўзбекистоннинг икки вакили биринчи турда мумкин бўлган олти очкодан тўрт очко жамғарди.
ОФК Элит Чемпионлар лигасининг навбатдаги ўйинлари 12 октябрь куни бўлиб ўтади. «Нефтчи»ни умумий босқичдаги энг мураккаб сафарлардан бири кутмоқда — фарғоналиклар Ар-Риёдда Саудия Арабистонининг «Ал-Наср» клубига қарши ўйнайди.
«Пахтакор» эса иккинчи тур учрашувини ўз майдонида ўтказади. Тошкентликлар Саудия Арабистонининг яна бир вакили — «Ал-Қодисия»ни қабул қилади.
Ўзбекистоннинг яна бир клуби — «Насаф» ОФК Чемпионлар лигаси-2 мусобақасида иштирок этмоқда. Қарши жамоаси БААнинг «Ал-Ваҳда», Кувайтнинг «Кувайт СК» ва Баҳрайннинг «Ал-Халдия» клублари билан бирга А гуруҳидан жой олган.
«Насаф» биринчи учрашувини 16 сентябрь куни Баҳрайнда «Ал-Халдия»га қарши ўтказади. Баҳс Баҳрайн Миллий стадионида бўлиб ўтади.
