sputniknews.uz сайти фотосурати
Тошкентдаги суд Ўзбекистон Давлат хавфсизлик хизмати (ДХХ)нинг собиқ офицерлари ва Ташқи меҳнат миграцияси агентлиги (ТММА) раҳбарининг собиқ ўринбосарини узоқ муддатларга — 16 йилгача озодликдан маҳрум қилиш жазосига ҳукм қилди. Айбланувчиларга ватандошларни Жанубий Кореяга ишлаш учун юбориш жараёнида коррупция схемасини ташкил қилганлик айби қўйилган, деб хабар беради «Азаттик Азия».
Суд ҳукмига кўра, ДХХ ички хавфсизлик бошқармасининг собиқ бошлиғи, полковник Алижон Ашуров 16 йилга озодликдан маҳрум қилинган. Ғанчар Узоқов ва Тимур Шариксиевнинг ҳар бири 15,5 йиллик қамоқ жазосига ҳукм қилинган. ТММА раҳбарининг собиқ биринчи ўринбосари Сухроб Сайфутдинов эса 15 йилга озодликдан маҳрум қилинган.
Ушбу иш бўйича суд жараёни ёпиқ тарзда ўтказилган, чунки тергов материалларида фуқароларнинг шахсий маълумотлари ва қонунчиликка кўра оммавий равишда ошкор қилиниши тақиқланган бошқа маълумотлар мавжуд бўлган.
Миграция соҳасидаги можаро ҳақида республика Бош прокуратураси 2026 йил май ойида маълумот берган эди. Назорат маҳкамаси маълумотларига кўра, профиль идора ходимларини ҳам ўз ичига олган фирибгарлар гуруҳи аниқланган бўлиб, улар ўзбекистонликларни Сеулга юбориш жараёнида коррупция схемасини йўлга қўйган. Тергов версиясига кўра, қонунбузарлар хизмат мавқеидан фойдаланиб, хорижга ишлаш учун кетишни истаган фуқаролардан расмий тўловлардан ташқари 7–12 минг доллардан маблағ ундирган. Бироқ, якунда мигрантлар ҳеч қаерга кета олмаган. Шу тариқа юзлаб одамлар алдов қурбони бўлган, фирибгарлар томонидан олинган маблағларнинг умумий миқдори қарийб 90 миллион долларга баҳоланган.
Жорий йил июль ойи охирида Кореяга меҳнат мигрантларини юбориш жараёнида коррупция жиноятларини содир этганликда гумонланаётган тўрт киши Жиноят кодексининг 210-моддаси 3-қисми «а» ва «б» бандлари («Пора олиш»), 243-моддаси («Жиноий фаолиятдан олинган даромадларни легаллаштириш») ҳамда 301-моддаси 1-қисми («Ҳокимиятни суиистеъмол қилиш, мансаб ваколатларидан четга чиқиш ёки ҳокимият ҳаракатсизлиги») бўйича айбланаётгани хабар қилинганди.
Мазкур иш ва Ташқи меҳнат миграцияси агентлиги ходимлари билан боғлиқ бошқа бир қатор можаролар фонида жорий йил сентябрь ойи бошида Ўзбекистон президенти Шавкат Мирзиёев агентлик директори Беҳзод Мусаевни лавозимидан озод қилди.
