Британиянинг меҳмонхоналарни банд қилиш Halalbooking платформаси ўзбек тилидаги сайтини ишга туширди. Компаниянинг таҳририятга келиб тушган пресс-релизида қайд этилишича, Halalbooking ўзини ўзбекча интерфейсга эга бўлган дунёдаги биринчи глобал меҳмонхоналарни банд қилиш платформаси деб эълон қилди.
Ўзбек тили инглиз, араб, турк, немис, француз, рус ва озарбайжон тиллари қаторида сервиснинг саккизинчи тилига айланди. Шуниси эътиборга лойиқки, Halalbooking’нинг ўзбекча версияси аввалги o‘, g‘, sh ва ch ҳарфлари ўрнига ö, ğ, ş ва ç белгиларидан фойдаланилган янгиланган лотин алифбосида тайёрланган. Компания вакилларининг билдиришича, иш жараёни фақатгина 450 мингдан зиёд сўзни таржима қилиш билан чекланиб қолмади: ўзбек мутахассислари банд қилишнинг турли босқичлари учун атамаларни синчковлик билан танлашига тўғри келди, чунки бир қатор тушунчаларнинг ўзбек тилидаги рақамли маҳсулотларда ҳозирча умумқабул қилинган муқобиллари мавжуд эмас.
Halalbooking мусулмон сайёҳларга ва оилавий дам олишга мўлжалланган. Сервис ҳалол таомлар, спиртли ичимликлардан холи хоналар, аёллар учун алоҳида бассейн ҳамда спа, чеккадаги шахсий бассейнли виллалар ва катта оилалар учун ёнма-ён хоналар борлигини ҳисобга олган ҳолда жойлашув вариантини танлаш имконини беради. Компания маълумотларига кўра, каталогга бутун дунё бўйича қарийб 500 минг меҳмонхона, вилла ва курортлар киритилган.
Ўзбекча талқиннинг йўлга қўйилишини компания Туркия, Форс кўрфази мамлакатлари, Мальдив ороллари, Европа ва Саудия Арабистонига сафар қилаётган ўзбекистонлик сайёҳларга бўлган юқори қизиқиш билан изоҳламоқда. Шу билан бирга, платформа чет эллик меҳмонларни жалб этиш мақсадида Ўзбекистоннинг ўз меҳмонхоналарига ҳам хизматлари ҳақидаги маълумотларни сайтга жойлаштиришни таклиф қилмоқда. Halalbooking таъкидлашича, дунёнинг 140 та давлатидан сайёҳлар унинг мижозлари ҳисобланади, содиқлик дастурида эса бир миллиондан ортиқ киши иштирок этмоқда.
ℹ️ Компанияга 2014 йилда Буюк Британияда асли озарбайжонлик Энвер Жеби ва Элнур Сеидли асос солган. «Ўз она тилимиздан кейин ўзбек тили биз платформамизда кўришни энг кўп истаган тил эди. Бу биз учун шахсий масала», — деди Halalbooking ҳаммуассиси ва бош операцион директори Энвер Жеби.
