Меҳрубон Сангинов. asiaplustj.info сайти фотосурати
Шу йил 10 октябрда Душанбеда пичоқлаб кетилган профессионал боксчи Меҳрубон ҳозирда АҚШда реабилитация курсидан ўтмоқда. Бу ҳақда «Азия-Плюс»га спортчининг ўзи маълум қилган.
Нашрнинг ёзишича, журналистлар шу йилнинг июль ойида колумбиялик Канер Гонсалесни мағлубиятга учратганидан сўнг медиа майдонидан ғойиб бўлган боксчи ва Душанбе бокс федерациясининг вақтинчалик раҳбари билан боғланишга қарор қилишган. Маълум бўлишича, спортчи жорий йилнинг декабрь ойида Орландода WBA йўналиши бўйича жаҳон чемпионлиги учун жангга тайёргарлик кўришдан аввал, яқинларини кўриш учун Душанбега таътилга чиқишга қарор қилган.
«Кечқурун шаҳарда йигитлар пойтахтимиздаги меҳмонларга ташланиб қолишди. Меҳмонларга бундай муносабатда бўлманглар, деб танбеҳ бердим. Кейин тўсатдан бу йигитлар менга ҳужум қилишди, улардан бири менга икки марта пичоқ урди», — деди боксчи.
26 ёшли спортчи ётқизилган Душанбедаги шошилинч жарроҳлик бўлимига ётқизилган 26 ёшли спортчига «чап кўкрак қафасига жароҳат етказилган» ташхиси қўйилган ва шошилинч операция қилинган. Шундан сўнг врачлар унга шифокор назоратида 2 ойдан 4 ойгача даволаниш ва реабилитация курслари тайинлаганлар. Уч ҳафта ўтгач, спортчи АҚШга жўнаб кетган.
Сангинов сўзларига кўра, у энди декабрь ойида бўлиб ўтиши режалаштирилган жанг бўлмаслигидан жуда хафа.
«Афсус, чемпионликни қўлга киритиш ва мамлакатимизни дунёга танитиш учун узоқ йўл босгандим. Ҳар куни бокс мухлислари қаерга йўқ бўлиб кетганимни сўрашади. Шунинг учун уларга қаерга «ғойиб» бўлганимни айтмоқчиман. Мен омон қолганим учун Аллоҳга шукр қиламан, унвонлар олишга ҳали вақтим бўлади. Мен албатта соғлиғимни тиклайман ва яна юртимиз шарафи учун курашиш учун рингга чиқаман», — дейди Сангинов.
Боксчига ҳужум қилганлар топилганми ёки йўқми, бу номаълум. Республика Ички ишлар вазирлиги ҳам бу борада ҳеч қандай баёнот бермаган.
Меҳрубон Сангинов 76,2 кг вазнда профессионал бокс бўйича WBC (Youth World Champion) ва WBB ( World Boxing Board) йўналишлари бўйича жаҳон чемпиони, суперўрта вазнда WBA NABA чемпиони, ўрта вазнда WBA America continental чемпиони. 2021 йил февраль ойидан буён у WВА рейтингининг кучли 15 талигидан жой олган.
