Қамоқхона. hronikatm.com сайти фотосурати
Туркманистонда Gadyr gijesi («Қадр кечаси») шарафига тавба қилган 463 нафар маҳкум афв этилади. Тегишли фармонни республика президенти Сердар Бердимуҳамедов имзолади, деб хабар беради «Туркменистан Сегодня» нашри.
Сердар Бердимуҳамедов ўз қарорини 15 апрель куни Вазирлар Маҳкамаси йиғилишида маълум қилган. Ўз қилмишига пушаймон бўлган маҳкумларни афв этиш акцияси анъанага айланганини таъкидлаган.
«Биз буюк аждодларимизнинг меҳр-мурувват ва инсонпарварлик тамойилларидан келиб чиқиб, уларни кейинги жазолардан озод қилиш учун эзгу чора-тадбирлар кўрмоқдамиз», — дейди Бердимуҳамедов.
Президент ҳуқуқ-тартибот идоралари раҳбарларига афв этилган шахсларни тезроқ озод этиш чораларини кўриш бўйича топшириқ берган, вилоятлар ҳокимлари зиммасига эса бу шахсларни иш билан таъминлаш вазифасини қўйган.
Президент озод этилган фуқароларга «мамлакатда амалга оширилаётган кенг кўламли ишларга муносиб ҳисса қўшиш, она Ватанга хизмат қилиш, виждонан меҳнати самарасидан баҳраманд бўлишликни» тилаган.
Туркманистонда Ислом динида қадрланадиган Қадр кечаси, шунингдек, Бетарафлик ва Мустақиллик кунлари арафасида маҳкумларни афв этиш акциялари мунтазам ўтказиб келинади. Шу тариқа Туркманистонда сўнгги беш йил ичида 20 мингдан ортиқ маҳкум озод этилган.
