Қозоғистонда миллиардерлар сув тошқинидан зарар кўрган ҳудудларга «бириктирилади»

Қосим-Жомарт Тўқаев Қўстанай вилоятидаги ишбилармонлар ва волонтёрлар билан учрашувда. akorda.kz сайти фотосурати

Қозоғистон президенти Қосим-Жомарт Тўқаев сув тошқинидан жабр кўрган ҳар бир вилоят, туман ва қишлоқларга маҳаллий миллиардерларни бириктирмоқчи. Бу ҳақда давлат раҳбари Қўстанай вилояти аҳолиси билан Тобол шаҳридаги тезкор штабда бўлиб ўтган учрашувда маълум қилди, деб ёзади Kursiv.kz.

«Бизда Forbes рўйхатига киритилган жуда йирик тадбиркорларимиз бор. Биз улар билан суҳбат ўтказамиз ва ҳар бирини вилоят, туман, қишлоққа бириктирамиз», — деди Тўқаев.

Президент бу ишбилармонлар манфаатидан келиб чиқишини, улар ўз сармоялари самарасини кўришини таъкидлади.

Бу Тўқаевнинг қозоғистонлик олигархларга ёрдам сўраб илк бор мурожаат қилиши эмас. 2022 йил январдаги тартибсизликлардан сўнг президент топшириғига кўра «Қазақстан халқына» жамғармаси тузилган, унга йирик тадбиркорлар ва корхоналар ўз ҳиссаларини қўшганди.

Қозоғистондаги ҳозирги сув тошқинлари сўнгги 80 йилдан ортиқ вақт ичида содир бўлган энг йирик табиий офатдир. Республиканинг бир қатор вилоятларида фавқулодда ҳолат эълон қилинган. Фавқулодда вазиятлар вазирлигининг сўнгги маълумотларига кўра, март ойи бошидан буён хавфли ҳудудлардан эвакуация қилинганлар сони 117 минг кишига етган.

ШУНИНГДЕК ЎҚИНГ
  • Тошкентда ҳарбий марш бўлиб ўтди

  • Алия Назарбоеванинг рейдерлик билан боғлиқ можаро марказида қолгани ва нега бу ишни ҳеч ким тергов қилишни хоҳламаётгани ҳақида

  • Қирғизистон президенти келтирган далиллар ва халқаро ташкилотларнинг «хорижий агентлар тўғрисида»ги қонун имзоланишига муносабати

  • «Крокус Сити Холл» да содир бўлган терактдан сўнг Россияда Марказий Осиёдан келган мигрантларга нисбатан босим кучайди