khovar.tj сайти фотосурати
Тожикистон президенти Эмомали Раҳмон қамоқ жазосига ҳукм қилинган шахсларни афв этиш тўғрисидаги фармонни имзолади. Ҳужжат 897 кишига тааллуқли, дея аниқлик киритади республика раҳбари матбуот хизмати.
Фармонда афв халқаро Наврўз байрами муносабати билан инсонпарварлик тамойилидан келиб чиқиб, мамлакат Конституциясининг 69-моддасига мувофиқ амалга оширилгани алоҳида таъкидланган.
«Ховар» ахборот агентлигининг хабар беришича, 21 март куни республика ахлоқ тузатиш муассасаларидан 200 нафар маҳкум озод этилган, улардан 147 нафари эркак ва 53 нафари аёл, 27 нафари вояга етмаганлар экани қайд этилган.
Эртаси куни президентнинг афв этиш тўғрисидаги фармонига кўра яна 697 нафар маҳкум озод этилган. Уларнинг 663 нафари эркаклар, 34 нафари аёллардир. ОАВ маълумотларига кўра, гап умумий ва қатъий режимли колонияларда, вояга етмаганлар учун муассасаси, Нурекдаги аёллар колонияси, шунингдек, Душанбе, Хўжанд ва Бохтардаги тергов изоляторларида сақланаётган маҳкумлар ҳақида кетмоқда.
Давлат ахборот агентлигининг таъкидлашича, Раҳмоннинг мустақилликнинг дастлабки йилларидан то амалдаги фармонигача бўлган кечиримли ҳаракатлари туфайли 102 минг 671 нафар шахс афв этилган, шундан 58 минг 233 нафар фуқаро жиноий жазони ўташдан озод этилган.
«Азия-Плюс» нашри ёзишича, Тожикистон президенти охирги марта 2020 йил 30 октабрда навбатдаги сайловларда ғалаба қозонганидан сўнг дарҳол маҳкумларни афв этиш тўғрисида қарор қабул қилган. Ўшанда фармонга биноан 378 маҳкум озод этилган эди.
Бироқ, қарийб беш йил аввал ҳам, ҳозирда ҳам қайси жиноятлар учун ҳукм қилинганлар афв этилгани ҳақида жамоатчиликка маълумот берилмаган.
Раҳмон бундай фармонларни имзолаган Марказий Осиё республикаларининг ягона раҳбари эмас. Масалан, 20 март куни Туркманистон раҳбари Сердар Бердимуҳамедов яқинлашиб келаётган Қадр кечаси муносабати билан 321 маҳбусни афв этгани маълум бўлди. Қолаверса, қўшни Ўзбекистонда бўлгани каби бу давлатда ҳам бундай қарорлар йилига бир неча марта, одатда, давлат ёки диний байрамлар арафасида қабул қилинади.
