Мигрантлар. pressa.ru сайти фотосурати
Россия ҳукумати мамлакатда ноқонуний яшаётган хорижликларни легаллаштириш муддатини 10 сентябргача узайтирди. Бу ҳақда Қирғизистон Ташқи ишлар вазирлиги сайтида хабар берилди.
Россия президенти фармонига кўра, ноқонуний яшаётган хорижликлар 30 апрелгача Россиядаги ўз мақомини тартибга солишлари керак эди. Белгиланган муддат ўзгаргани Қирғизистоннинг Россиядаги элчиси Кубаничбек Бўконтаевнинг Россия президентининг хорижий давлатлар билан минтақалараро ва маданий алоқалар бўйича бошқармаси раҳбари Игорь Маслов билан учрашувида маълум бўлган.
Қайд этилишича, Қирғизистон аввали Россиядан ушбу фармоннинг амал қилиш муддатини узайтириш масаласини кўриб чиқишни сўраган.
Учрашувда қирғизистонлик мигрантларнинг Москвада ҳаммомида оммавий ҳибсга олиниши билан боғлиқ воқеа муҳокама қилинган. Бўконтаев Россия томонини ушбу масалани кўриб чиқишда холислик ва адолат тамойилларига амал қилишга чақирган.
Чет эл фуқаролари Россияда яшашини 30 апрелгача қонунийлаштириши, акс ҳолда мамлакатни тарк этиши зарурлигига доир РФ президентининг фармони ўтган йил 30 декабрда эълон қилинди. Ҳужжат мигрантларга тегишли бўлиб, бундай шахсларга доир маълумотлар «назорат остидаги шахслар реестри»га киритилиши керак. Россия Федерациясида ноқонуний яшаётган 670 минг нафар чет эллик аниқланган. Реестрга киритилган чет элликлар депортация қилиниши керак, хусусан, улар юридик шахс сифатида рўйхатдан ўтиш ва мулкларини рўйхатга олиш ҳуқуқидан маҳрум этилади.
