ria.ru сайти фотосурати
Бирлашган Миллатлар Ташкилоти Бош Ассамблеяси Украинанинг мустақиллиги, суверенитети ва ҳудудий яхлитлигини қўллаб-қувватловчи резолюция лойиҳасини кўпчилик овоз билан қабул қилди. Бироқ, Қозоғистон, Қирғизистон, Тожикистон ва Ўзбекистон Марказий Осиё мамлакатлари бетараф бўлди, Туркманистон эса умуман овоз беришда иштирок этмади, дейилади БМТ Янгиликлар хизматининг Х ижтимоий тармоқ аккаунтида жойлаштирган маълумотида.
Натижада БМТнинг «Украинада узоқ муддатли тинчликни сақлаш» деб номланувчи ҳужжатини 107 мамлакат қўллаб-қувватлади. 12 мамлакат қарши овоз берди (Россия, Беларусь, Куба, Никарагуа, Эрон, Шимолий Корея ва бир қатор Африка мамлакатлари). Яна 51 мамлакат, жумладан, Марказий Осиё республикалари бетараф қолди.
Қўшма Штатлар Украинага ёрдам кўрсатаётгани ва можаро томонларини ҳарбий ҳаракатларни тўхтатишга фаол чақираётгани, Украина ва Россия ўртасидаги музокараларда воситачи сифатида иштирок этаётганига қарамай бетараф қолган мамлакатлар қаторида бўлди.
Резолюция бўйича овоз бериш йиғилиши Дания, Латвия, Греция, Буюк Британия ва Франция кўмагида Украина томонидан илгари сурилди. Бу Россиянинг қўшни давлат ҳудудида махсус ҳарбий операция (МҲО) бошланганининг тўрт йиллигига тўғри келди.
Ҳужжатда айтилишича, БМТ Бош Ассамблеяси Украинанинг халқаро миқёсда тан олинган чегаралари, жумладан, ҳудудий сувлари доирасида суверенитети, мустақиллиги, бирлиги ва ҳудудий яхлитлигига қатъий содиқлигини яна бир бор тасдиқлайди. Резолюция муаллифлари Қўшма Штатлар ва Европа давлатларининг ҳарбий қарама-қаршиликни тугатишга қаратилган саъй-ҳаракатларини олқишлайдилар.
Резолюцияда шунингдек, Украина ва Россия ўртасида зудлик билан, тўлиқ ва шартсиз сулҳ тузиш; халқаро ҳуқуққа мувофиқ узоқ муддатли тинчлик ўрнатиш; ҳарбий асирларни тўлиқ алмаштириш ва ноқонуний ҳибсга олинган шахсларни озод қилиш; ва мажбуран кўчирилган ёки депортация қилинган фуқароларни, шу жумладан болаларни қайтариш чақириқлари яна бир бор таъкидланган.
