Рафаэль Уразбахтин. »Қайрат» ФК фотосурати
Олмаотанинг «Қайрат» клуби бош мураббий Рафаэль Уразбахтин жамоани тарк этганини маълум қилди. Мутахассис ўз ташаббуси билан истеъфога чиқиш ҳақида ариза берган ва клуб раҳбарияти унинг аризасини қаноатлантирган. Бу ҳақда «Қайрат» матбуот хизмати хабар берди.
Уразбахтин жамоа кетма-кет учинчи марта чемпион бўлиш имкониятини йўқотганидан сўнг клубни тарк этди. 25 октябрь куни «Қайрат» сафарда «Актўбе» билан 2:2 ҳисобида дуранг ўйнади. Премьер-лига тугашига бир тур қолганида, олмаоталиклар 64 очко тўплади ва энди 68 очкога эга «Ордабаси»га етиб ололмади.
Шу билан бирга, «Қайрат» учун мавсум УЕФА Конференциялар лигасида давом этмоқда. Умумий босқичнинг икки туридан кейин жамоа бир очко тўплади: дастлаб олмаоталиклар Латвиянинг «Рига» клуби билан 1:1 ҳисобида дуранг ўйнади, кейин эса ўз майдонида Грециянинг «Панатинаикос» жамоасига 1:5 ҳисобида йирик мағлубиятга учради. «Қайрат» навбатдаги еврокубок учрашувини 5 ноябрь куни сафарда «Аталанта»га қарши ўтказади.
Уразбахтин 2024 йил сентябрь ойида «Қайрат»нинг асосий жамоаси бош мураббийи этиб тайинланган эди. Унинг раҳбарлигидаги илк мавсумнинг ўзидаёқ клуб Қозоғистон чемпиони бўлганди.
2025 йилда «Қайрат» чемпионлик унвонини ҳимоя қилди, мамлакат Суперкубогини қўлга киритди ва ўз тарихида биринчи марта УЕФА Чемпионлар лигасининг умумий босқичига йўл олди.
Жорий мавсумда эса олмаоталиклар Конференциялар лигасининг умумий босқичига чиқди ва чемпионат тугашига бир тур қолганида кумуш медалларни қўлга киритишни кафолатлади.
«Қайрат» бош мураббийи вазифасини бажарувчи этиб аввал «Қайрат-Жастар» жамоасини бошқарган Жора Арутюнян тайинланди. У жамоани чемпионатнинг «Алтай»га қарши сўнгги учрашувига, кейин эса Конференциялар лигасидаги иштирокини давом эттиришга тайёрлайди.
