Каннаваро жавоб беради

Фабио Каннаваро. Ўзбекистон МОҚ фотосурати

Ўзбекистон терма жамоаси бош мураббийи, италиялик мутахассис Фабио Каннаваро июль ойи охирида Италиядан Тошкентга қайтади ва 2026 йилги жаҳон чемпионати якунлари бўйича катта матбуот анжуманида иштирок этади. Бу ҳақда журналист Назрулла Сайдулаев ўзининг Telegram-каналида маълум қилди.

Италиялик мутахассис барибир аввал режалаштирганидан эртароқ таътилини тўхтатишга мажбур бўлди. Жаҳон чемпионатидаги иштирокдан сўнг Каннаваро жамоа билан бирга Ўзбекистонга қайтмади, балки Нью-Йоркдан тўғридан-тўғри ўз ватанига йўл олди. У бу қарорини икки ой давомида узлуксиз терма жамоа билан ишлагани билан изоҳлаб, «Сентябрда кўришамиз» деганди.

Жамоа Тошкентга қайтган пайтида Каннаваронинг йўқлиги алоҳида танқидларга сабаб бўлди. Виталий Левченко Eurasia Football нашрига берган интервьюсида бу ҳолатни бошқарувдаги хато сифатида баҳолади. Унинг фикрича, муваффақиятсиз турнирдан сўнг бош мураббий жамоага қайтиб, ҳисобот бериши ва жаҳон чемпионати давомида қабул қилинган қарорларни тушунтириши керак эди.

Нашр қайд этишича, Жаҳон чемпионатида барча ўйинларда мағлуб бўлган Иордания ва Ироқ терма жамоаларида ҳам тегишли хулосалар чиқарилган ҳамда бош мураббийларнинг спорт раҳбарияти олдида ҳисобот бериш жараёни бошланган. Энди шундай муҳокама Ўзбекистонда ҳам ўтказилиши кутилмоқда.

Ўзбекистон терма жамоаси ўз тарихидаги биринчи жаҳон чемпионатини K гуруҳида охирги ўринда якунлади. Жамоа Колумбияга — 1:3, Португалияга — 0:5 ва ДР Конгога — 1:3 ҳисобларида ютқазиб, очко тўплай олмади ва турнирни 2:11 тўплар фарқи билан якунлади.

Каннаварога қаратилган асосий саволлар жамоа ҳимоясини ташкил этиш билан боғлиқ бўлди. Ўз даврининг энг яхши ҳимоячиларидан бири ва «Олтин тўп» соҳиби сифатида ундан терма жамоанинг ўйинини ишончлироқ қилиш кутилган эди. Бироқ, жамоа 11 та гол ўтказиб юборди, позицион хатоларга йўл қўйди, линиялар орасида бўш зоналар қолдирди ва марказий ҳимоячилар учун етарли суғурта тизимини таъминлай олмади.

Шунингдек, таркибдаги доимий ўзгаришлар ва ўйинни бошқариш ҳам танқид қилинди. Турнир давомида Каннаваро қайд этилган 26 футболчидан 23 тасидан фойдаланди. У бу ротацияни жароҳатлар, айрим ўйинчиларнинг етарли ўйин амалиётига эга эмаслиги ва кенгроқ таркибга имконият бериш истаги билан изоҳлади. У натижа учун масъулиятни тан олди, бироқ штабнинг барча қарорларини хато деб ҳисобламаслигини таъкидлади.

Италиялик мутахассиснинг тайинланиши атрофидаги муҳокамалар ҳам қайтадан фаоллашди. Каннаваро 2025 йил октябрда терма жамоа бош мураббийи этиб тайинланиб, жамоани жаҳон чемпионатига олиб чиққан Тимур Кападзени алмаштирган эди. Валерий Кечинов бундай алмашинувни баҳсли қарор сифатида баҳолаган. Валерий Непомнящий эса янги штаб футболчилар имкониятларини етарлича ўрганишга улгурмагани ва жамоа тайёр бўлмаган тактик схемалардан фойдаланганини таъкидлаган.

Азамат Абдураимов ҳам Каннаваронинг тайинланиши ҳозирча терма жамоага сезиларли устунлик бермаганини айтган. Унинг фикрича, мураббий ҳимоядаги муаммоларни ҳал қила олмаган, кадрлар танловида хатоларга йўл қўйган ва Конго ДР билан ўйинда вазиятни ўзгартиришга эриша олмаган. Шунингдек, у италиялик мураббий штабида ўзбек мураббийларининг йўқлигини танқид қилиб, улар тажриба ўрганиши мумкин бўлар эди, деган фикрни билдирган.

Каннаваронинг ўзи натижаларни мамлакатнинг жаҳон чемпионатида илк бор иштирок этиши билан боғлиқ босим, рақиблар даражаси ва футболчиларда тажриба етишмаслиги билан изоҳлади. Унинг таъкидлашича, ўйинчилар қўлларидан келган барча ишни қилган ва бу мусобақадан олинган сабоқ келажакда терма жамоага ёрдам беради. У кейинги асосий мақсад сифатида Осиё Кубогини белгилаганини айтиб, жамоа ушбу турнирга тайёргарликни сентябрь йиғинидан бошлаши кераклигини билдирган.