aki.kg сайти фотосурати
Ўзбекистонда Америка «Печак лигаси» (The Ivy League) университетларига ўқишга киришга тайёрлаш миллий дастури амалга оширилади. Ушбу лойиҳа мамлакат президенти Шавкат Мирзиёев ташаббуси билан амалга оширилмоқда, деб хабар беради унинг матбуот хизмати.
Давлат раҳбарига 27 март куни иқтидорли ёшларни қўллаб-қувватлаш чора-тадбирлари тақдимотида Миллий дастур механизми ҳақида батафсил маълумот берилди. Таъкидланишича, лойиҳа олти босқичдан иборат бўлади. Бу йил мутахассислар уч минг нафар номзодни танлаб олади, уларга Президент ва ихтисослаштирилган мактабларнинг 208 нафар ўқитувчиси сабоқ беради. Ўқувчилар «Ренессанс» оромгоҳида йил давомида 3 ҳафталик интенсив ўқув курсларда ўқитилади. Яхши натижа кўрсатган 40 нафари «Печак лигаси» университетларига тажриба алмашиш учун юборилади.
Республикада шунга ўхшаш бошқа лойиҳалар ҳам амалга оширилмоқда. Шу тариқа, 2025 йил сентябрь ойидан халқаро мактаб ишга туширилиши кутилмоқда. Биринчи босқичда саккизинчи синф битирувчилари орасидан 60 нафар энг иқтидорли ўғил-қиз танлаб олинади. Ўқув дастури халқаро стандартлар асосида тузилган ва учта блокни ўз ичига олади:
✅ асосий фанлар;
✅ ихтисослик фанлари;
✅ етакчилик ва ижтимоий фаолликни ўргатувчи фанлар.
Ўқув йили 3 даврга бўлиниб, 11 ой давом этади.
Мутасадди вазирлик ва идоралар вакиллари хорижда таълим олган ёшларни иш билан таъминлаш масалаларига ҳам алоҳида эътибор қаратилаётганини таъкидлади. Бу борада «Мамлакат олтин фонди ҳамжамияти»ни тузиш таклиф этилмоқда. У орқали иқтидорли ёшлар ягона платформада бирлаштирилади. Хорижда таълим олиб қайтганлар учун имтиёзлар, грантлар, стартап дастурлари ва бошқа имкониятлар яратилади. Ҳар йили 25 майда ҳамжамият қурултойи ўтказилиб, унда таълим ислоҳотлари, иқтидорли ёшлар учун яратилган имкониятлар, чет эл олийгоҳлари тажрибаси каби мавзуларда мулоқот йўлга қўйилади.
Мутасаддилар бугунги кунда мамлакатда болалар ва ўсмирларнинг интеллектуал салоҳиятини юксалтириш учун барча шарт-шароит яратилаётганини сарҳисоб қилишди. Жумладан, 14 та Президент мактаби, 185 та ихтисослашган ва 9 та ижод мактаби ташкил этилди. Улардаги ўқитиш ва баҳолаш тизими 1 минг 500 та умумтаълим мактабида ҳам жорий этилди. Иқтидорли битирувчилар учун «Янги Ўзбекистон» университети очилди.
Шунингдек, «Эл-юрт умиди» жамғармаси орқали 750 нафар ватандош хорижда таҳсил олмоқда. Тақдимот якунида Мирзиёев бу борадаги ишларни такомиллаштириш, иқтидорли ёшларни қўллаб-қувватлаш чора-тадбирларини кенгайтириш бўйича кўрсатмалар берди.
ℹ️ «Печак лигаси» — Америка Қўшма Штатларининг шимоли-шарқида жойлашган саккизта хусусий Америка олий таълим муассасаси уюшмасидир. Ассоциацияга қуйидаги университетлар киради: Браун, Колумбия, Корнелл, Дартмут, Гарвард, Принстон, Пенсилвания ва Йел. Бу университетлар ўзининг юксак нуфузи ва таълим сифати билан ажралиб туради.
